26 чэрвеня Пантыфік сустрэўся з дэлегацыяй Італьянскай лігі па барацьбе з ракам. Ён падзякаваў гасцям за спрыянне прафілактыцы анкалагічных захворванняў, у тым ліку праз фарміраванне культуры жыцця, заснаванай не на камерцыйных інтарэсах, а на павазе да Божага дару.
Не менш каштоўным з’яўляецца супрацоўніцтва Лігі з пастаўшчыкамі медыцынскіх паслуг, а таксама дапамога сем’ям, хворым на рак, «паколькі служэнне тым, хто пакутуе, гэта хрысціянскі лад жыцця, які палягае на спалучэнні пакоры і цішыні, без пошуку ўзнагароды», як адзначыў папа Францішак.
Чалавек, калі яго адольвае хвароба, асабліва анкалагічная, апынаецца як бы на перыферыі жыцця. І гэта з’яўляецца выклікам для кожнага хрысціяніна, каб прыйсці на гэту перыферыю, становячыся свядомым інструментам ласкі, дадаў ён.
Папа Рымскі заклікаў грамадзянскую і касцёльную супольнасці не баяцца блізкасці з хворымі людзьмі, пяшчоты адносна іх, не лічыць прабыванне з імі страчаным часам, прапанаваць ім падтрымку, суцяшэнне, ствараючы сапраўдную прастору салідарнасці.
Папа выказаў спадзяванне, што, паколькі здароўе з’яўляецца адным з асноўных і фундаментальных дабротаў кожнага чалавека, прафілактыка рака будзе распаўсюджвацца на ўсіх.
Беларуская рэдакцыя Ватыканскага радыё
