Пошук

19.06.2017 15:10  

18 чэрвеня падчас малітвы «Анёл Панскі» на плошчы Чв. Пятра ў Ватыкане папа Францішак нагадаў пра асаблівую ролю ўрачыстасці Божага Цела.

Аналізуючы ўрывак з Евангелля на гэты дзень, Пантыфік дадаў, што Укрыжаваны Сын Чалавечы — гэта сапраўднае Пасхальнае Ягнё, якое выводзіць з няволі граху і падтрымлівае на шляху ў зямлю абяцаную.

«Эўхарыстыя — гэта сакрамэнт Божага цела, аддадзенага за жыццё свету; хто насычаецца гэтай ежай, той прабывае ў Хрысце і жыве для Яго. Спажываць Хрыста азначае быць у Ім, стаць сынамі ў Сыне», — сказаў Святы Айцец.

Папа Францішак дадаў, што ў Эўхарыстыі Езус дае самога сябе як духоўную моц, каб «дапамагчы нам ажыццявіць на практыцы Яго запаведзь — любіць так, як Ён палюбіў нас, будуючы гасцінныя і адкрытыя супольнасці перадусім для людзей найбольш слабых, бедных і патрабуючых».

Насычацца Хрыстом у Эўхарыстыі, паводле слоў Папы, азначае таксама з даверам даручаць сябе Яму і дазволіць Яму нас павесці за сабою.

«Гэта значыць прыняць Езуса замест свайго ўласнага “я”. Такім чынам бескарыслівы дар любові, атрыманы ад Езуса ў эўхарыстычнай Камуніі праз дзеянне Святога Духа, падмацоўвае любоў да Бога і да братоў і сясцёр, якіх мы сустракаем на нашым штодзённым шляху», — зазначыў Святы Айцец.

Пантыфік нагадаў, што «падмацаваныя Целам Хрыста, мы становімся ўсё больш і насамрэч містычным Целам Хрыста»:

«Пра гэта нам нагадвае апостал Павел: “Келіх благаслаўлення, які благаслаўляем, ці не з’яўляецца ўдзелам у Крыві Хрыста? Хлеб, які ламаем, ці ж не з’яўляецца ўдзелам у Целе Хрыста? Адзін ёсць хлеб, адно цела — мы многія. Бо мы ўсе саўдзельнікі аднаго Хлеба” (1 Кар 10, 16–17)».

«Няхай Дзева Марыя, якая заўжды была з’яднаная з Езусам, Хлебам жыцця, дапаможа нам нанава адкрыць прыгажосць Эўхарыстыі, з вераю ёю насычацца, каб жыць у еднасці з Богам і з братамі», — заключыў папа Францішак.

Дк. Мікола Гракаў

Абноўлена 16.08.2017 11:20
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа