Папа са смуткам выказаўся пра кровапралітныя мафійныя міжусобіцы, якія мелі месца ў першыя дні 2017 года ў турме Манаўса. «З Бразіліі прыйшлі драматычныя весткі пра разню ў турме Манаўса, дзе жорсткія сутыкненні паміж варожымі групоўкамі прынеслі дзясяткі смерцяў. Я хацеў бы выказаць свой смутак і трывогу з-за таго, што адбылося», —сказаў Францішак 4 студзеня на заканчэнне агульнай аўдыенцыі ў Ватыкане.
Пантыфік заклікаў вернікаў маліцца за загінулых, за іх сем’і і ўсіх зняволеных у гэтай бразільскай турме, а таксама за людзей, якія там працуюць. Турмы павінны быць «месцамі рэабілітацыі і сацыяльнай рэінтэграцыі, а ўмовы жыцця зняволеных павінны быць вартыя чалавека», — падкрэсліў Святы Айцец.
У Бразіліі прынамсі 60 вязняў сталі ахвярамі разборак двух мафіёзных кланаў у турме Манаўса ў цэнтральнай Амазоніі. Прадстаўнікі мясцовага наркакартэля ўзялі ў закладнікі 12 ахоўнікаў і 74 вязні з картэля горада Сан-Паўлу.
«Я заклікаю вас маліцца за загінулых зняволеных і за ўсіх асоб, пазбаўленых волі ва ўсім свеце. Няхай турмы будуць на самой справе месцамі сацыяльнай рэінтэграцыі», — заклікаў яшчэ раз Папа.
Паводле беларускай рэдакцыі Ватыканскага радыё
(VGr)
