У пасланні на Сусветны дзень міру 2025 года, якое было прадстаўлена на прэс-канферэнцыі ў Ватыкане 12 снежня, Папа Францішак заклікаў да глабальнай салідарнасці і стварэння новай фінансавай сістэмы, якая вызваліць бедныя краіны ад цяжару даўгоў і дасць надзею на мірную будучыню.
Як паведаміла Беларуская рэдакцыя парталу Vatican News, на парозе Юбілею 2025 года Папа Францішак звяртаецца да ўсяго свету з пасланнем надзеі і міру. Святы Айцец нагадвае пра глыбокія біблейскія карані Юбілею як часу вызвалення і міласэрнасці, калі кожныя сорак дзевяць гадоў народ атрымліваў магчымасць пачаць жыццё нанава.
Кожны чалавек мае права на годнае жыццё
«Ніводзін чалавек не павінен быць прыгнечаны. Мы — браты і сёстры, дзеці аднаго Айца, народжаныя свабоднымі паводле волі Божай», — падкрэслівае Пантыфік, заклікаючы пачуць «роспачны крык аб дапамозе», які даносіцца з розных куткоў свету.
Папа звяртае ўвагу на тое, што сучасная несправядлівасць часта набывае форму «структур граху», якія падтрымліваюцца шырокай сістэмай саўдзелу. Асабліва востра гэта праяўляецца ў міжнароднай фінансавай сістэме, дзе знешні доўг стаў інструментам кантролю над беднымі краінамі.
Экалагічны доўг як новая форма несправядлівасці
Святы Айцец указвае на цесную сувязь паміж экалагічным і фінансавым доўгам.
«Гэта два бакі аднаго медаля — логікі эксплуатацыі, якая вядзе да крызісу запазычанасці», — тлумачыць Папа Францішак, заклікаючы да стварэння новай глабальнай фінансавай архітэктуры.
Папа прапануе канкрэтныя крокі для пераадолення крызісу, сярод якіх значнае скарачэнне або поўнае дараванне міжнародных даўгоў, стварэнне глабальнай фінансавай хартыі, заснаванай на салідарнасці, і выкарыстанне часткі сродкаў, якія ідуць на ўзбраенне, для барацьбы з голадам.
Шлях да міру праз раззбраенне сэрцаў
«Сапраўдны мір можа нарадзіцца толькі з сэрца, вызваленага ад трывогі і страху вайны», — падкрэслівае Пантыфік, цытуючы святога Яна XXIII. Ён заклікае ўсіх людзей добрай волі працаваць на карысць міру, які пачынаецца з «раззбраення сэрца» і гатоўнасці дараваць даўгі бліжнім.
У заключэнні Паслання Святы Айцец звяртаецца да кіраўнікоў дзяржаў, міжнародных арганізацый і рэлігійных лідэраў з заклікам зрабіць 2025 год сапраўдным годам міру і міласэрнасці.
«Мір прыходзіць не толькі з заканчэннем вайны, але з пачаткам новага свету, у якім мы адкрываем сябе больш аб’яднанымі і больш братэрскімі», — падкрэслівае Папа Францішак.
