24 ліпеня Папа Францішак у сваім допісе ў сацыяльнай сетцы X (былы Twitter). заклікаў старэйшае пакаленне і моладзь да сумеснай працы над стварэннем больш гуманнага грамадства.
«Нам патрэбны новы саюз паміж моладдзю і пажылымі людзьмі, каб крыніца жыцця тых, хто мае вялікі жыццёвы вопыт, сілкавала парасткі надзеі маладых», — цытуе Святога Айца Беларуская рэдакцыя парталу Vatican News. «Так мы спазнаем прыгажосць жыцця і ствараем братэрскае грамадства», — лічыць 87-гадовы Пантыфік.
У бліжэйшую нядзелю, 28 ліпеня, Касцёл у чацвёрты раз адзначыць Сусветны дзень бабуль, дзядуль і пажылых людзей, у які будзе магчымасць атрымаць поўны адпуст.
У Беларусі ў Дзень пажылых людзей Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB узначаліць цэлебрацыю святой Імшы ў Нацыянальным санктуарыі Маці Божай Будслаўскай.
