На заканчэнне агульнай аўдыенцыі, якая прайшла 5 чэрвеня ў Ватыкане, Папа Францішак абвясціў аб падрыхтоўцы ім дакумента аб Найсвяцейшым Сэрцы Езуса.
«Мы перажываем месяц, прысвечаны Найсвяцейшаму Сэрцу Езуса», — нагадаў Папа, словы якога пыводзіць Беларуская рэдакцыя парталу Vatican News. Святы Айцец заўважыў, што 27 снежня мінулага года споўнілася 350 гадоў з дня першага аб’яўлення Найсвяцейшага Сэрца Езуса французскай манахіні Маргарыце Марыі Алякок, а святкаванне гэтага юбілею будзе працягвацца да 27 чэрвеня 2024 года.
«У сувязі з гэтым я з радасцю рыхтую дакумент, які аб’яднае ў сабе каштоўную рэфлексію папярэдніх тэкстаў касцёльнага вучэння і доўгую гісторыю, якая ўзыходзіць да тэкстаў Святога Пісання, каб сёння зноў прапанаваць усяму Касцёлу гэты прыгожы культ, поўны духоўнай прыгажосці.
Я думаю, што нам будзе вельмі карысна паразважаць над рознымі аспектамі любові Пана, якія могуць асвятлціць шлях касцёльнага абнаўлення, а таксама сказаць нешта значнае свету, які, здаецца, згубіў сэрца. Прашу вас суправаджаць мяне ў малітве на працягу гэтага перыяду падрыхтоўкі. Я маю намер абнародаваць гэты дакумент ў верасні гэтага года», — сказаў Папа Францішак.
