17 красавіка ў Італіі выйшла ў свет кніга святара з Трэвіза Лучыё Банора «Прысвячэнне Пію Х. Сучасныя партрэты» (выдавецтва Edizioni Kappadue, 2023), прадмову да якой напісаў Папа Францішак.
У сваёй працы аўтар, супрацоўнік Дзяржсакратарыяту Святога Пасаду, сабраў 80 партрэтаў святога Пія Х, які кіраваў Касцёлам у 1903–1914 гадах.
Прадмова да кнігі была асобна апублікавана ў ватыканскім штодзённіку «L’Osservatore Romano». У ёй Святы Айцец зазначыў, што адчувае блізкую сувязь са сваім папярэднікам святым Піем Х у справе абароны міру. Разам з тым Папа Францішак зазначыў, што Пій Х «не заключаны ў мінулых часах гісторыі і не прыўлашчаны пэўнымі групамі, а належыць сённяшняму Касцёлу, людзям Касцёла». На думку Святога Айца, ён быў «Папам для ўсіх».
Папа Францішак нагадаў, што Пій Х плакаў з-за Першай сусветнай вайны, якая выбухнула з апошні год яго пантыфікату.
«Ён упрошваў магутных свету скласці зброю. Я адчуваю сябе вельмі блізкім да яго ў гэты трагічны час у свеце», — напісаў Святы Айцец.
«Я заўсёды шанаваў Пія Х з многіх прычын», — прызнаўся Папа Францішак. Асабліва за тое, што ён так шмат увагі надаваў катэхезе і сакрамэнту Эўхарыстыі.
«Пій патлумачыў усяму Касцёлу, што без Эўхарыстыі і без прыняцця аб’яўленых праўдаў асабістае вера слабне і памірае», — напісаў Пантыфік і нагадаў пры гэтым, што Пій Х заснаваў Папскі Біблійны інстытут.
Папа Францішак звярнуў увагу на тое, што перэгрынацыя рэліквій яго святога папярэдніка, кананізаванага ў 1954 годзе, у дыяцэзіях Трэвіза, Падуі і Венецыі на поўначы Італіі, якая адбывалася летась, паказала, «што Пій Х не заключаны ў мінулых часах гісторыі і не прыўлашчаны пэўнымі групамі, а належыць сённяшняму Касцёлу, людзям Касцёла, гэта значыць ахрышчаным любога ўзросту, якія хочуць быць вернымі Евангеллю і сваім пастырам і якія ўспрымаюць святых як сапраўдныя ўзоры жыцця і сваіх шчырых сяброў у дарозе за Езусам і Евангеллем, чэрпаючы з прыкладаў і выбараў іх жыцця.
Няхай жыве святы Пій Х і няхай жыве глыбока ў сэрцы сённяшняга Касцёла!» — сцвердзіў Папа Францішак.
Пій Х (Джузэпэ Мэльхіёрэ Сарта) паходзіў з італьянскай правінцыі Трэвіза. Падчас свайго пантыфікату ён здзейсніў рэформу літургіі і пашыраў культ Эўхарыстыі, даўшы магчымасць дзецям раней прыступаць да Камуніі, а таксама заахвочваў усіх вернікаў часцей прымаць гэты сакрамэнт. Ён асудзіў мадэрнізм як ерась і стараўся абараняць Касцёл ад яго ўплыву. Сярод шматлікіх кананізацый, здзейсненых Піем Х, былі кананізацыі Бэрнадэты Субіру і Тэрэзы з Лізьё.
