Роля жанчын у Касцёле, праца Сіноду і ажыццяўленне рэформы Рымскай курыі, а таксама сітуацыя з войнамі і канфліктамі ў свеце сталі тэмамі пасяджэння Рады кардыналаў па дапамозе Святому Айцу ў кіраванні Касцёлам.
Як паведаміла Беларуская рэдакцыя парталу Vatican News, працы праходзілі ў ватыканскім Доме святой Марты. У іх прымаў удзел Францішак.
15 красавіка ўдзельнікі працягнулі разважанне аб ролі жанчын у Касцёле. Падчас гэтай часткі сустрэчы выступілі сястра Хэджына да Коста Пэдру з Кангрэгацыі Місіянерак Беззаганнага Зачацця, якая падзялілася канкрэтнымі гісторыямі і думкамі некаторых бразільскіх жанчын, а таксама прафесар Стэла Мора, выкладчыца тэалагічнага факультэта Папскага Грыгарыянскага ўніверсітэта, якая прааналізавала ролю культур у прызнанні ролі жанчыны ў розных частках свету.
16 красавіка кардынал Марыё Грэк і біскуп П’еро Кодзі прадаставілі справаздачу аб бягучым Сінодзе, а потым прагучалі разважанні аб рэалізацыі апостальскай канстытуцыі Prædicate Evangelium у дыяцэзіяльных курыях і даклады кожнага кардынала аб сацыяльнай, палітычнай і эклезіяльнай сітуацыі ў рэгіёнах свету, якія яны прадстаўляюць.
Падчас пасяджэння ўдзельнікі неаднаразова звярталі ўвагу на войны і канфлікты ў многіх месцах па ўсім свеце, асабліва на Блізкім Усходзе і ва Украіне, і памяталі пра гэта ў сваіх малітвах.
Кардыналы, а разам з імі і Папа, выказалі заклапочанасць тым, што адбываецца, і надзею на актывізацыю намаганняў па пошуку шляхоў да перамоваў і міру.
Як паведамляецца ў заяве Прэс-службы Святога Пасаду, наступнае пасяджэнне Рады адбудзецца ў чэрвені гэтага года.
