2 і 3 снежня ў Ватыкане прайшло апошняе ў 2024 годзе пасяджэнне Рады кардыналаў па дапамозе Святому Айцу ў кіраванні Касцёлам.
Як паведаміла Беларуская рэдакцыя парталу Vatican News, кардыналы абмяркоўвалі пытанні калегіяльнасці, ролі жанчын у Касцёле і сінадальнай місіі.
На пасяджэнні прысутнічалі ўсе ўдзельнікі дарадчага органа на чале з Папам Францішкам. Яно праходзіла ў Доме Святой Марты.
Кардынал Марчэло Сэмэрара прадставіў даклад аб калегіяльнасці ў Касцёле і адносінах паміж мясцовымі Касцёламі і касцёльнымі сходамі. Гэтая тэма натуральна перайшла ў абмеркаванне нядаўна завершанага Сінода.
Значная частка сустрэчы была прысвечана ролі жанчын у Касцёле. Кардыналы падвялі вынікі дыскусій па гэтай тэме, якія вяліся на працягу апошніх чатырох пасяджэнняў Рады.
Кардынал Освальд Грасіяс, старшыня адпаведнай рабочай групы, прадставіў даклад аб ролі папскіх прадстаўнікоў у кантэксце сінадальнай місіі. Таксама абмяркоўвалася ўкараненне ў дыяцэзіяльных курыях прынцыпаў Апостальскай канстытуцыі Prædicate Еvangelium.
Традыцыйна кардыналы абмяняліся меркаваннямі аб становішчы Касцёла і свету ў розных рэгіёнах, падзяліліся занепакоенасцю наконт існуючых канфліктаў і крызісаў.
Наступнае пасяджэнне Рады кардыналаў запланавана на красавік 2025 года.
