Экалагічная арганізацыя Sustainable Earth Eating звярнулася да Папы Францішка з заклікам аднавіць у Касцёле абавязак устрымання ад мяса па пятніцах.
Кампанія Sustainable Earth Eating вырашыла звярнуцца да Святога Айца, бо вядома, што Пантыфік заклапочаны экалагічнымі праблемамі. У 2015 годзе выйшла энцыкліка Laudato si', у якой Папа Францішак, між іншым, заклікае да аховы навакольнага асяроддзя.
Як паведамляе Deon.pl са спасылкай на businessinsider.com.pl, «згаданая арганізацыя выступае за ўстойлівую вытворчасць прадуктаў харчавання, і ў стаўленні Папы да экалогіі яна ўбачыла магчымасць змяніць харчовыя звычкі ва ўсім свеце. Гаворка ідзе пра пост ў пятніцу, які з'яўляецца даўняй традыцыяй Касцёла, паводле якой вернікі ўстрымліваліся ад ужывання мяса ў якасці формы пакаяння.
Нягледзячы на тое, што, згодна з кананічным правам (кан. 1251, 1252), адмова ад ужывання мяса па пятніцах ніколі не адмянялася для ўсіх вернікаў, старэйўых за 14 гадоў, з 1966 года мясцовыя епіскапаты могуць уводзіць прынцып, паводле якога кожны вернік мае магчымасць вызначыцца з формай пятнічнага пакаяння.
Гэта значыць, што ў гэтыя дні неабавязкова адмаўляцца ад ужывання мяса. Напрыклад, можна адмовіцца ад ужывання кавы, калі чалавек п’е яе штодзённа.
Паводле праведзеных у 2022 годзе Кэмбрыджскім універсітэтам даследаванняў, у Вялікабрытаніі толькі 25 працэнтаў мясцовых католікаў устрымлівалася ад спажывання мяса па пятніцах. Цікава, што іх рашэнне дазволіла скараціць выкіды вуглякіслага газа на 55 тыс. тон у год.
Арганізацыя Sustainable Earth Eating звярнулася да Пантыфіка з просьбай аднавіць абавязак устрымання ад мяса па пятніцах у Касцёле, каб паўплываць на навакольнае асяроддзе і паспрыяць змене харчовых звычак людзей ва ўсім свеце.
«Пятніцамі без мяса Папа Францішак можа натхніць мільёны католікаў і людзей ва ўсім свеце перайсці на дыету, якая будзе больш лагоднай для нашай планеты», — кажа Джэйн ДэМарынс, генеральны дырэктар SEE.
«Прадстаўнікі арганізацыі лічаць патрэбным уключыць вяртанне ўстрымання ад пятніц у абноўленую версію папскай энцыклікі. Гэта цалкам адлюстравала б крытычную ўзаемасувязь паміж выбарам дыеты і аховай навакольнага асяроддзя»,
— паведамляе businessinsider.com.pl.
«Вяртанне Каталіцкім Касцёлам абавязку ўстрымання ад мяса па пятніцах было б магутным сімвалам адзінства і вялізным крокам да абароны нашай планеты. Мы заахвочваем Папу разгледзець гэтую прапанову, калі ён рыхтуецца прыняць удзел у штогадовай кліматычнай сустрэчы ААН IPCC», — кажа Джэйн ДэМарынс.
