З 9 па 11 лістапада ў Ватыкане праходзіў міжнародны форум рэктараў і супрацоўнікаў санктуарыяў.
Як паведамляе Беларуская рэдакцыя парталу Vatican News, у апошні дзень форуму на аўдыенцыі ў Зале Паўла VI Папа Францішак зазначыў, што святы народ Божы сцякаецца ў санктуарыі дзеля малітвы, суцяшэння і ўпэўненасці ў будучыні.
У сваёй прамове, Святы Айцец заўважыў, што санктуарыі — гэта асаблівыя, прывілеяваныя месцы малітвы, суцяшэння і надзеі. Перш за ўсё, пілігрымы скіроўваюцца ў санктуарыі для таго, каб памаліцца і сустрэць ласку Божую.
Пантыфік параіў вельмі адказна падыходзіць да выбару святароў для споведзі, каб вернікі, якія прыходзяць у санктуарыі, не знаходзілі перашкод на шляху да сапраўднага і поўнага паяднання з Богам.
«Дараваць, заўсёды дараваць», — нагадаў Папа Францішак, заклікаючы супрацоўнікаў санктуарыяў надаваць таксама асаблівую ўвагу адарацыі.
Па-другое, вернікі адпраўляюцца ў санктуарыі па суцяшэнне. Хвароба блізкага чалавека, страта сям’і, цяжкія жыццёвыя сітуацыі часта з’яўляюцца прычынамі самоты і суму, з якімі людзі прыходзяць у санктуарыі. Суцяшэнне — не абстрактная ідэя, а спагадлівая і пяшчотная блізкасць да тых, хто адчувае боль і пакуты. Яно раўнасільнае «дотыку Божай ласкі», таму ў санктуарыях не могуць адсутнічаць службы суцяшэння.
Нарэшце, у санктуарыі ідуць дзеля таго, каб «з большай упэўненасцю глядзець у будучыню». Пілігрым мае патрэбу ў надзеі.
«Важна, каб, вярнуўшыся дадому, ён адчуваў сябе задаволеным і напоўненым супакоем, таму што ён даверыўся Богу»,
— адзначыў Пантыфік, параіўшы надаваць вялікую ўвагу гасціннаму прыёму і пастырскаму клопату, каб перад тым, як пакінуць санктуарый, пілігрымы атрымалі словы і знакі надзеі.
Напрыканцы прамовы Папа нагадаў, што наступны год будзе цалкам прысвечаны малітве напярэдадні Юбілею 2025 года, і запрасіў закасаць рукавы, каб дапамагчы вернікам зноў адкрыць для сябе цэнтральную ролю штодзённай малітвы. Малітвы ад сэрца, ад душы, «не як у папугаяў», — заахвоціў Папа Францішак.
