Генеральны сакратарыят Сіноду Біскупаў апублікаваў камюніке, у якім патлумачыў прычыны рашэння Папы Францішка правесці XVI Звычайную Генеральную Асамблею ў дзве сесіі.
Пра гэтае сваё рашэнне Святы Айцец паведаміў у нядзелю 16 красавіка ў прамове на заканчэнне традыцыйнай малітвы «Анёл Панскі», нагадвае Беларуская рэдакцыя парталу Vatican News. Першая сесія пройдзе з 4 па 29 кастрычніка 2023 года, другая — роўна праз год. Пры гэтым Пантыфік спаслаўся на Апостальскую канстытуцыю Episcopalis communio, якая прадугледжвае такую магчымасць.
Рашэнне вынікае з жадання, каб тэма Касцёла сінадальнага, улічваючы яе шырокасць і важнасць, стала прадметам больш працяглага разгляду не толькі ўдзельнікаў сінадальнай асамблеі, але і ўсяго Касцёла.
Сінод — гэта не проста падзея, але і працэс, падчас якога ўвесь народ Божы пакліканы разам ісці да таго, што Дух Святы дапамагае яму распазнаць як волю Бога для Яго Касцёла, — патлумачылі аўтары заявы.
Двум генеральным асамблеям папярэднічаюць два этапы сінадальнага працэсу: мясцовы і кантынентальны. Першы праходзіў у Касцёле з 2021 года, увосень 2022 года распачаўся другі. Ён завершыцца Кантынентальнымі сінадальнымі асамблеямі, на якія вернікі збяруцца са студзеня па сакавік 2023 года.
