29 сакавіка была абнародавана інструкцыя Кангрэгацыі Каталіцкай Адукацыі пад назвай: «Тоеснасць каталіцкай школы на карысць культуры дыялогу».
Як паведамляе Беларуская рэдакцыя парталу Vatican News, новая інструкцыя адносна каталіцкіх школ павінна спрыяць стварэнню грамадскіх адносін і клопату пра самых слабых, прапанаваць вывераныя каштоўнасці, якія з’яўляюцца асновай хрысціянскага жыцця.
Так вызначыў мэты дакумента прэфект Кангрэгацыі Каталіцкай Адукацыі кардынал Джузэпэ Вэрсальдзі.
Іерарх, непасрэдна звязаны з рэалізацыяй прапанаванага Папам Францішкам Глабальнага адукацыйнага саюза, адзначыў, што клопат аб выхаванні павінен інтэграваць усіх суб’ектаў грамадскага жыцця: сем’і, школы, аб’яднанні і арганізацыі грамадзянскай супольнасці, Касцёлы і рэлігійныя суполкі, а таксама органы ўлады на дзяржаўным узроўні.
У інструкцыі звяртаецца ўвага на неабходнасць супрацоўніцтва ў выхаванні педагогаў і настаўнікаў, якія павінны не толькі даносіць да вучняў пазітыўныя веды, але і ствараць супольнасць дыялогу, у якой прысутнічае павага да розных меркаванняў, дух братэрства і рэальнага прагрэсу. Вельмі важным вымярэннем адукацыі з’яўляецца фармаванне афектыўнай і сексуальнай сфер так, каб яны былі сканцэнтраваны на дары сябе, а не на валоданні і выкарыстанні іншых.
«Сутнасць адукацыі — сэрца. Трэба стварыць сінтэз выхаваўчага працэсу, у якім пераплятаюцца любоў, прызнанне розных роляў і функцый, адкрытасць канкрэтнаму чалавеку і павага да самага слабога.Гаворка пра тое, каб стварыць сям’ю, якая жыве сведчаннем любові, чым і стараецца жыць Каталіцкі Касцёл», — звярнуў увагу кардынал прэфект.
На думку іерарха, «важна ўлічваць такія фактары, як сур’ёзнасць, дысцыпліна, жаданне вучыцца, прафесіяналізм, і спалучаць іх з іншымі выхаваўчымі сродкамі ў атмасферы любові і міласэрнасці». Кардынал Вэрсальдзі перакананы, што ў такім выпадку маладыя людзі будуць знаходзіцца не ў атмасферы строгасці, абмежаванай толькі навучаннем, а ў атачэнні тых, хто іх паважае, накіроўвае і ўдасканальвае такім чынам, каб выхаваць свабодную асобу, унутрана інтэграваную ў розных вымярэннях жыцця, грамадскага і хрысціянскага.
