20 сакавіка ў Ватыкане прадставілі афіцыйную праграму візіту папы Францішка ў марыйны санктуарый у Фаціме (Партугалія). Пілігрымка пройдзе 12 і 13 мая ў 100-гадовы юбілей аб’яўлення Найсвяцейшай Панны Марыі.
Прыбыццё Святога Айца на авіябазу ў Монтэ-Рэаль запланавана на 16.20 па мясцовым часе. Тут 12 мая адбудзецца афіцыйная цырымонія прывітання і прыватная сустрэча з прэзідэнтам краіны. Папа Францішак наведае таксама капліцу ваеннай авіябазы, а затым на верталёце адправіцца ў Фаціму.
Прылёт запланаваны на 17.35 на мясцовы стадыён, адкуль Пантыфік «адкрытым» аўтамабілем адправіцца непасрэдна ў марыйны санктуарый.
Тут, у Капліцы аб’яўленняў, ён застанецца некаторы час на прыватнай малітве, пасля чаго благаславіць свечкі, звернецца да вернікаў з кароткай прамовай і далучыцца да ружанцовай малітвы.
Наступны дзень, 13 мая, пачнецца для Папы з сустрэчы з прэм’ер-міністрам Партугаліі. Затым ён наведае базыліку Маці Божай Ружанцовай. У 10.00 перад фацімскім санктуарыем распачнецца цэлебрацыя галоўнай святой Імшы, якую ўзначаліць Пантыфік.
Пасля Імшы адбудзецца абед з удзелам мясцовага епіскапату. Вылет Святога Айца з авіябазы ў Монтэ-Рэаль запланаваны на 15.00 пасля афіцыйнай цырымоніі развітання. У 19.05 Папу чакаюць у рымскім аэрапорце Ciampino.
Папа Францішак стане чацвёртым Пантыфікам пасля Паўла VI, Яна Паўла ІІ і Бэнэдыкта XVI, які наведае марыйны санктуарый у Фаціме.
