Пошук

15.03.2017 09:21  

Адысці ад зла, навучыцца рабіць дабро і дазволіць Пану весці сябе наперад — вось шлях велікапоснага навяртання. Пра гэта адзначыў папа Францішак 14 сакавіка падчас ранішняй Эўхарыстыі ў Ватыкане.

У сваёй гаміліі Святы Айцец заўважыў, што кожны чалавек штодзённа робіць нешта кепскае і нават «самы святы грашыць сем разоў на дзень».

Праблема ў тым, каб не прызвычайвацца жыць падобным чынам і пастаянна адмаўляцца ад таго, што «атручвае душу».

«Трэба штодня вучыцца рабіць нешта, каб стаць лепшым, чым дзень таму. Адыходзіць ад зла і вучыцца рабіць дабро: вось правіла навяртання. Навярнуцца, не значыць прыйсці да феі, якая перамяніць нас з дапамогай чарадзейнай палачкі. Не! Гэта шлях», — адзначыў Пантыфік.

Паводле яго слоў, вернікам неабходныя адвага, каб адысці ад зла, і пакора, каб навучыцца рабіць дабро. Яно ж абавязкова павінна выяўляецца ў канкрэтных учынках, а не толькі заставацца на словах, падкрэсліў папа Францішак і нагадаў, як Хрыстус папракаў фарысяў за тое, што «гавораць і не робяць».

«Калі няма канкрэтнасці, не можа быць і навяртання», — сказаў ён.

Папа нагадаў, што Езус заўсёды спадарожнічае вернікам на шляху навяртання, і нават, калі іх «грахі будуць, як чырвань, збялеюць як снег». Адзінае, аб чым Бог просіць, гэта пакора, бо «той, хто ўзвышае сябе, прыніжаны будзе, а той, хто прыніжае сябе, будзе ўзвышаны», — сказаў Папа на заканчэнне сваёй ранішняй гаміліі.

Беларуская рэдакцыя Ватыканскага радыё

Абноўлена 05.06.2017 13:29
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа