![](/3/images/news/2021/12/2021-12-09-AFP6324.jpg)
8 снежня ў 6.15 Папа Францішак наведаў плошчу Іспаніі ў Рыме, каб ушанаваць Марыю Беззаганную. Ён паставіў кошык белых руж да падножжа калоны з фігурай Маці Божай.
Візіт у знакавае месца меў прыватны характар.
Папа Францішак маліўся да Багародзіцы, «просячы ў Яе цуду аздараўлення для многіх хворых, аздараўлення для народаў, якія моцна пакутуюць ад войнаў і кліматычнага крызісу, а таксама навяртання, каб растапіла каменныя сэрцы тых, хто будуе сцены, жадаючы адгарадзіцца ад пакут іншых», — паведаміла са спасылкай на прэс-службу Святога Пасаду Беларуская рэдакцыя парталу Vatican News.
У 6.20 Папа пакінуў П’яцца-дзі-Спанья і скіраваўся ў базыліку Святой Марыі Вялікай (Санта-Марыя-Маджорэ), дзе працягнуў малітву перад іконай Апякункі Вечнага горада — Маці Божай Снежнай, якая ўшаноўваецца пад тытулам Salus Populi Romani — Збаўленне рымскага народа. А 7-й гадзіне Пантыфік быў ужо ў Ватыкане.
Сёлета, як і ў мінулым годзе, традыцыйнае штогадовае набажэнства Папы не суправаджалі натоўпы пілігрымаў: рашэнне адправіцца на плошчу ў незвычайны час, а не ў другой палове дня, было абумоўлена цяперашняй надзвычайнай эпідэмічнай сітуацыяй, каб пазбегнуць любой рызыкі заражэння, выкліканага шматлюднымі сходамі.