11 кастрычніка Папа Францішак прызначыў новага старшыню Службы Папскіх літургічных цэлебацыі і кіраўніка Папскай музычнай капэлы. Ім стаў 56-гадовы Монсіньёр Дыего Джаванні Равэллі.
Як паведаміла Беларуская рэдакцыя парталу Vatican News, будучы Папскі цырымоніймайстар нарадзіўся 1 лістапада 1965 года ў Лацэтэ (Ламбардыя). Прэзбітэрскае пасвячэнне атрымаў у 1991 годзе, у 2000 годзе абараніў дыпломную працу па педагогіцы ў Папскім салезіянскім універсітэце, а ў 2010 годзе — дактарат па Святой літургіі ў Папскім літургічным інстытуце святога Анзэльма ў Рыме.
У 1998 годзе святар распачаў служэнне ў Апостальскай элемазінарыі ў Ватыкане, дзе ў 2013 годзе стаў кіраўніком аддзела. Пасля супрацоўніцтва са Службай Папскіх літургічных цэлебрацый у якасці памочніка цырымонімайстра, у 2006 годзе быў прызначаны Папскім цырымонімайстрам.
Монсіньёр Дыего Джаванні Равэллі змяніў на пасадзе старшыні Службы Папскіх літургічных цэлебрацый і кіраўніка Папскай музычнай капэлы біскупа Гвідо Марыні, які 29 жніўня 2021 года быў прызначаны пастырам Тартонскай дыяцэзіі ў Генуэзскай Мітраполіі.
