5 сакавіка ў 7.45 па Сярэднееўрапейскім часе Папа Францішак вылецеў з рымскага аэрапорта Ф’юмічына ў Багдад, распачаўшы сваё 33-е апостальскае падарожжа, якое працягнецца да 8 сакавіка.
Святы Айцец правядзе ў паветры чатыры з паловай гадзіны на борце самалёта Airbus A330 італьянскай авіякампаніі Alitalia, перш чым ступіць на іракскую зямлю.
Як адзначае італьянская рэдакцыя парталу Vatican News, Папа Францішак — першы Пантыфік, які наведае з апостальскім візітам Ірак — калыску цывілізацыі паміж рэкамі Тыграм і Эўфратам, несучы святло Евангелля і слова сапраўднай любові на зямлю, дзе яшчэ шалеюць віхуры вайны.
Гэты візіт Святога Айца ў краіну Персідскага заліву з пераважна мусульманскім насельніцтвам праходзіць пад евангельскім дэвізам: «Вы ўсе браты».
Напярэдадні візіту Папа Францішак скіраваў да народа Ірака адмысловы відэазварот, у якім назваў сябе пілігрымам пакаяння, міру і надзеі, заклікаўшы да братэрства ўсіх духоўных нашчадкаў Абрагама.
Як перадала прэс-служба Святога Пасаду, на выхадзе з Дома святой Марты Папа Францішак затрымаўся на некалькі хвілін з групай іракскіх бежанцаў, якія ў мінулыя гады дзякуючы дабрачынным арганізацыям Супольнасці святога Эгідыя і Auxilium знайшлі прытулак у Італіі. Яны прыйшлі праводзіць Святога Айца ў падарожжа на іх радзіму ў суправаджэнні Папскага элемазінарыя кардынала Конрада Краеўскага, адказнага за дабрачыннасць і духоўныя даброты Касцёла.
У аэрапорце Папа развітаўся з прысутнымі прадстаўнікамі духавенства і ўлады, пасля чаго, з чорным партфелем у левай руцэ і маскай на твары, падняўся па трапе ў самалёт.
На борце лайнера па просьбе Пантыфіка быў змешчаны абраз Маці Божай Ларэтанскай, якая сто гадоў таму была абвешчана Апякункай усіх, хто падарожнічае ў паветры.
Цяпер таксама адзначаецца Ларэтанскі юбілей, які Святы Айцец працягнуў да 10 снежня.
Ужо сёння, адразу пасля прыбыцця, Папу Францішка чакаюць першыя сустрэчы на іракскай зямлі. Першая з іх — з прэм’ер-міністрам Ірака Мустафой Абдэль Латыфам Мушэтам, які сустрнэне высокага госця ў аэрапорце. Пасля гэтага прадугледжана афіцыйная црымонія сустрэчы і прыёму, а таксама візіт ветлівасці да прэзідэнта краіны. У прэзідэнцкім палацы Папа выступіць з першай афіцыйнай прамовай на іракскай зямлі, у якой звернецца да ўладаў краіны, грамадзянскай супольнасці і дыпламатычнага корпусу.
Пасля гэтага Святы Айцец на машыне скіруецца ў багдадскую сіра-каталіцкую катэдру Маці Божай Збаўлення, дзе сустрэнецца з біскупамі, святарамі, манахамі, семінарыстамі і катэхетамі.
