21 студзеня Папа Францішак прыняў на аўдыенцыі прэфекта Кангрэгацыі па справах кананізацыі кардынала Марчэло Сэмерара і ўхваліў дэкрэты, якія датычацца беатыфікацыйных спраў васьмі Слугаў Божых.
Як паведамляе беларуская рэдакцыя парталу Vatican News, першым з дакументаў прызнаецца мучаніцтва італьянскага святара кс. Джаванні Форназіні, забітага з нянавісці да веры падчас Другой сусветнай вайны ў 1944 г.
Іншыя дэкрэты датычацца прызнання гераічнасці цнотаў.
Гаворка ідзе пра двух італьянскіх святароў: кс. Мікэле Арканджэло Марыю Антоніё Вінці, памерлага ў 1943 г., і кс. Руджэро Марыю Капута, памерлага ў 1980 г.; англійскую законніцу Элізабэт Проўт, заснавальніцу Кангрэгацыі Сясцёр Найсвяцейшага Крыжа і Мукі Нашага Пана Езуса Хрыста, памерлую ў 1864 г.; італьянскага семінарыста Паскуале Канцы, памерлага ў 1930 г.; трох свецкіх вернікаў: іспанца Сант’яго Масарнаў-і-Фэрнандэса, памерлага ў 1882 г.; італьянку Адэле Баноліс, заснавальніцу дабрачынных «Ініцыятыў дапамогі і сацыяльнага адкуплення», памерлую ў 1980 г.; француза Жэрома Лежона, выбітнага лекара-педыятра, першага старшыню Папскай акадэміі жыцця, памерлага ў 1994 г.
