Святы Айцец ухваліў дэкрэты аб беатыфікацыі, прызнанні цуду і гераічнасці цнот. Новымі благаслаўлёнымі Касцёла стануць два манаха: базыліянін з Лівана і францішканін з Францыі.
21 лютага 2026 года Леў XIV прыняў на аўдыенцыі ў Ватыкане кардынала Марчэла Сэмерара, прэфекта Дыкастэрыі па справах кананізацыі, ухваліўшы пяць дэкрэтаў, падрыхтаваных гэтай установай.
У хуткім часе ў Касцёле з’явяцца два новыя благаслаўлёныя: Бешара Абу-Мурад, ліванскі манах з Базыліянскага ордэна Найсвяцейшага Збаўцы, дзякуючы заступніцтву якога адбыўся цуд аздараўлення жанчыны, прыкаванай да інваліднага вазку, а таксама францішканін Габрыэль Марыя, сузаснавальнік ордэна Звеставання Найсвяцейшай Панны Марыі, які жыў у Францыі на мяжы XV і XVI стагоддзяў.
Тры дэкрэты датычаць прызнання гераічнасці цнот: італьянскага дыяцэзіяльнага святарa Франчэска Ламбардзі, індыйскага капуцына Тэафана і італьянскага свецкага верніка Фаўста Джэі з супольнасці «Маўклівыя работнікі Крыжа».
