З’явілася інфармацыя аб першым замежным падарожжы Пантыфіка пасля перапынку, звязанага з пандэміяй каранавірусу. Ён плануе адправіцца на Блізкі Усход.
Пра гэта паведамляе беларуская рэдакцыя парталу Vatican News. «Прымаючы запрашэнне Рэспублікі Ірак і мясцовага Каталіцкага Касцёла, Францішак здзейсніць Апостальскае падарожжа ў вышэйзгаданую краіну з 5 па 8 сакавіка 2021 года, наведваючы Багдад, раўніну Ур, звязаную з памяццю Абрагама, Эрбіл, а таксама Масул і Каракаш на раўніне Нінэвія», — гаворыцца ў афіцыйнай заяве прэс-службы Святога Пасаду.
Праграма падарожжа будзе апублікавана пазней. Яна будзе ўлічваць развіццё надзвычайнай сітуацыі ў галіне аховы здароўя.
25 студзеня гэтага года Папа прымаў у Ватыкане Прэзідэнта Ірака Бархама Салеха.
Тады было заяўлена, што перад краінай стаяць праблемы садзейнічання стабільнасці і працэсу рэканструкцыі, якія прадугледжваюць шлях дыялогу і пошук адэкватных рашэнняў на карысць грамадзян і нацыянальнага суверэнітэту. Цэнтральнае месца тут займае важнасць захавання гістарычнай прысутнасці хрысціянаў і неабходнасць гарантавання іх бяспекі і месца ў будучыні краіны.
У Іраку да 2003 г., перад канфліктам, які прывёў да падзення Садама Хусэйна, было каля 1,4 млн хрысціянаў. Жах вайны і акупацыя Нінэвійскай раўніны тэрарыстычнай Ісламскай дзяржавай у перыяд з 2014 г. па 2017 г. скараціў іх колькасць прыблізна да 300–400 тыс. Прэзідэнт Салех неаднаразова падкрэсліваў каштоўнасць хрысціянаў і іх ролю ў грамадстве, а прэм’ер-міністр Мустафа Аль Казымі запрасіў хрысціян, якія пакінулі Ірак, вярнуцца, каб зрабіць свой уклад у рэканструкцыю краіны.
Аднак мір, бяспека і стабільнасць усё яшчэ застаюцца марамі. Эканамічны крызіс, беспрацоўе, карупцыя і каля 2 млн унутрана перамешчаных асобаў — сапраўдныя выклікі для Ірака.
Паводле ацэнак UNICEF, больш за 4 млн чалавек маюць патрэбу ў гуманітарнай дапамозе, палова з іх — дзеці.
У сітуацыі, калі не хапае бальніц і лекаў, пандэмія COVID-19 забівае тысячы людзей.
Апостальскі візіт у Ірак з 1 па 3 снежня 1999 г. павінен быў стаць першым этапам пілігрымкі Яна Паўла ІІ у Вялікі юбілей 2000-годдзя хрысціянства. Але ён не быў рэалізаваны, паколькі Садам Хусэйн пасля некалькіх месяцаў перамоў не даў сваёй згоды на яго.
