3 снежня Папа скіраваў пасланне з нагоды Міжнароднага дня інвалідаў. Святы Айцец прапанаваў паразважаць над яго сёлетняй тэмай — «Адбудаваць лепш: на шляху да інклюзіўнага і ўстойлівага свету пасля пандэміі з улікам патрэб інвалідаў».
Як паведамляе беларуская рэдакцыя парталу Vatican News, гэтую тэму натхніла евангельская прыпавесць пра дом, збудаваны на скале ці на пяску (Лк 10, 25-37).
Дажджы, рэкі і вятры, якія пагражалі гэтаму дому, паводле Пантыфіка, можна атаясаміць з «культурай адчужэння», распаўсюджанай у наш час.
У ёй «людзі больш не разглядаюцца як асноўная каштоўнасць, якую трэба паважаць і абараняць, асабліва калі яны бедныя ці з абмежаванымі магчымасцямі».
«Мы ўсе знаходзімся ў адным чаўне пасярод неспакойнага мора, якое можа нас палохаць, але ў гэтым чаўне ёсць тыя, каму яшчэ складаней, і сярод іх — людзі з сур’ёзнымі формамі інваліднасці», — заўважыў Папа.
Пастыр паўсюднага Касцёла дадаў, што, нягледзячы на важныя дасягненні ў сферы ўсведамлення годнасці кожнага чалавека і ўключэння інвалідаў у жыццё грамадства, дагэтуль на культурным узроўні застаюцца розныя формы непрыняцця і маргіналізацыі. Прычына гэтага заключаецца ў «нарцысічным і ўтылітарысцкім мысленні» і неразуменні таго, што «ўразлівасць належыць усім».
«Таму важна, асабліва ў гэты Дзень, падтрымліваць культуру жыцця, якая няспынна будзе пацвярджаць годнасць кожнага чалавека, асабліва абараняючы людзей з інваліднасцю ўсіх узростаў і сацыяльных станаў», — напісаў Святы Айцец.
Папа адзначыў, што сапраўднай «скалой», на якой трэба будаваць грамадства, а таксама праграмы і ініцыятывы, адрасаваныя асобам з абмежаванымі магчымасцямі, павінна стаць інклюзіўнасць.
«Моц ланцуга залежыць ад увагі, якая даецца самым слабым звёнам», — заўважыў Пантыфік.
Звяртаючыся да касцёльных структур, Святы Айцец заклікаў іх клапаціцца пра адпаведныя і даступныя прылады для перадачы веры, а таксама пра належную фармацыю ў сферы душпастырства людзей з інваліднасцю і выкарыстання інклюзіўных душпастырскіх інструментаў.
«Парафіяльныя супольнасці павінны працаваць над пашырэннем сярод вернікаў адкрытасці да людзей з інваліднасцю. Для стварэння цалкам даступнай парафіі недастаткова толькі разбурыць архітэктурныя бар’еры, у першую чаргу патрэбны салідарныя і прасякнутыя духам служэння паводзіны і дзеянні парафіян у адносінах да інвалідаў і іх сем’яў», — напісаў Папа.
«Скалой», на якой трэба будаваць грамадства, павінна стаць спрыянне актыўнаму ўдзелу людзей з інваліднасцю ў яго жыцці, дадаў Пантыфік.
Яны, па яго словах, павінны мець магчымасці для прыняцця сакрамэнтаў, удзелу ў літургіі і евангелізацыі, быць «актыўнымі суб’ектамі душпастырства, а не толькі яго адрасатамі».
«Мэта ў тым, каб не толькі клапаціцца пра іх, але даць ім магчымасць актыўна ўдзельнічаць у жыцці грамадзянскай і касцёльнай супольнасці. Гэты складаны і нават цяжкі шлях дазволіць нам усё лепш і лепш фарміраваць сумленне, здольнае прызнаць кожнага ў якасці ўнікальнага і непаўторнага чалавека», — лічыць Пантыфік.
Святы Айцец падкрэсліў, што асобы з інваліднасцю могуць быць эфектыўна задзейнічаны ў катэхізацыі, і заклікаў забяспечыць ім належную фармацыю ў гэтай сферы.
Папа пажадаў умацоўваць супрацоўніцтва паміж грамадзянскімі і касцёльнымі структурамі на карысць будавання трывалага «дому», здольнага прымаць таксама людзей з інваліднасцю; «дому», які будзе стаяць на скале інклюзіўнасці і актыўнага ўдзелу.
