14 снежня валанцёры парафіяльнай суполкі Caritas, якая дзейнічае пры парафіі катэдральнага касцёла Найсвяцейшага Імя Марыі ў Мінску, наведалі спецыяльную школу-інтэрнат у аграгарадку Расна (Магілёўская вобласць, Дрыбінскі раён).
У час радаснага адвэнтавага чакання, каб як мага больш людзей магло адчуць радасць і цеплыню Божай любові, вернікі сталічнай архікатэдральнай парафіі па ініцыятыве парафіяльнага Caritas і па благаслаўленні пробашча, ксяндза каноніка Дзмітрыя Пухальскага, зладзілі свята для амаль сотні дзяцей з Раснянскай спецыяльнай школы-інтерната.
Да выхаванцаў валанцёры завіталі разам са святым Мікалаем, ролю якога бліскуча выконваў дыякан Аляксандр Шыманскі, і з камандай музыкаў павіншавалі дзяцей, дорачы ім цеплыню сваіх сэрцаў, усмешкі, а таксама радасныя забавы і танцы. Акрамя таго, валанцёры правялі майстар-класы па вырабу святочных упрыгожанняў, якія дзеці, размеркаваныя па розных узроставых групах, зацікаўлена і старанна рабілі разам і якія засталіся ім як прыемны напамін пра весела праведзены час у добрай кампаніі.
Усім выхаванцам школы-інтэрната валанцёры прывезлі падарункі, якія на працягу некалькіх тыдняў збіралі парафіяне мінскай архікатэдры.
Дзеці былі вельмі ўзрушаныя такой увагай да сябе з боку зусім незнаёмых людзей з далёкага Мінска, якія, як аказалася, ведаюць пра іх і з любоўю клапоцяцца.
Прыемным дапаўненнем на дзіцячым свяце сталі цукеркі і іншыя салодкія ласункі, якія для Раснянскай школы-інтэрната падрыхтаваў і передаў Caritas Мінска-Магілёўскай архідыяцэзіі.
Развітваючыся, валанцёры запрасілі дзяцей наведаць Мінск, а таксама абяцалі самі пры магчымасці зноў прыехаць да сваіх маленькіх сяброў, каб прапанаваць ім новыя цікавыя заняткі і весела правесці час.
Пробашч архікатэдральнай парафіі ў Мінску ксёндз Дзімітрый Пухальскі і суполка парафіяльнага Caritas шчыра дзякуюць усім, хто не застаўся абыякавым і прычыніўся да добрай справы дапамогі дзецям у перыяд Адвэнту.
