Яшчэ ў сакавіку Апостальская Пэнітэнцыярыя выдала спецыяльны дэкрэт, дзе гаворыцца пра ўдзяленне поўнага адпусту вернікам, якія заразіліся на каранавірус, тым, хто знаходзіцца на каранціне, а таксама супрацоўнікам службы аховы здароўя, сем’ям і ўсім, хто якімсьці чынам закрануты гэтай праблемай.
Як паведамляе польская рэдакцыя парталу Vatican News, поўны адпуст — гэта дапамога, якую ўдзяляе Касцёл, каб перажываць эпідэмію ў духу веры і асабістага навяртання. Каб атрымаць яго, трэба адкінуць усялякую прывязанасць да граху, удзельнічаць у святой Імшы з дапамогай сродкаў масавай камунікацыі або проста памаліцца.
«Гэта павінна быць спалучана з воляй спаўняць звычайныя ўмовы адпусту, значыць прыступіць да сакрамэнтальнай споведзі, святой Камуніі і прамовіць малітву ў інтэнцыі Святога Айца, калі гэта будзе магчыма»,
— адзначаецца ў дэкрэце.
Пад гэтымі ж умовамі Апостальская Пэнітэнцыярыя ўдзяляе поўны адпуст тым вернікам, якія будуць маліцца аб спыненні эпідэміі і ўмацаванні тых, хто пакутуе з яе прычыны, а таксама аб вечным збаўленні тых, хто памёр у выніку заражэння на каранавірус.
Поўны адпуст могуць атрымаць і вернікі, якія не змаглі прыняць сакрамэнт хворых і Віятык у хвіліну смерці.
