29 верасня Папа Францішак упаўнаважыў Кангрэгацыю па справах Кананізацыі абнародаваць дэкрэты, якія датычацца беатыфікацыйных працэсаў.
Як паведамляе беларуская рэдакцыя парталу Vatican News, Пантыфік ухваліў дэкрэт аб зацвярджэнні цуду, здзейсненага праз заступніцтва Слугі Божай Гаэтаны Таламэа, вядомай як Нуча, свецкай верніцы, памерлай у 1997 г. у Катандзара (Італія).
Таксама дэкрэтам была пацверджана мучаніцкая смерць Слуг Божых кс. Франчэско Кастара Соха Лопеса і трох яго паплечнікаў, дыяцэзіяльных святароў, забітых з нянавісці да веры ў Іспаніі паміж 1936 і 1938 гадамі.
Яшчэ два дэкрэты пацвярджаюць гераічнасць цнотаў дзвюх іспанак: Франсіскі Паскуаль Дамэнэк, заснавальніцы Кангрэгацыі Сясцёр Францішканак Беззаганнай, якая памерла ў 1903 г., і Марыі Далорэс Сегары Хестоса, заснавальніцы Кангрэгацыі Місіянерак Хрыста Святара, якая памерла ў 1959 г.
