З нагоды 100-годдзя з дня нараджэння Караля Вайтылы Нумізматычная палата Ватыкана выпусціла ў абарачэнне манету наміналам у 2 еўра з выяваю святога Яна Паўла ІІ.
Як паведаміла польская рэдакцыя парталу Vatican News, дырэктар Ватыканскага манетнага двара Маўро Алівэры адзначыў, што ў памяць найбольш важных падзей чаканяцца манеты менавіта такога наміналу.
Манета ў гонар 100-годдзя Яна Паўла ІІ была адчаканена ў колькасці 70 тыс. штук. Яна можа быць выкарыстана паўсюль, у адрозненне ад манет са срэбра і золата, якія маюць абарачэнне выключна ў Ватыкане. Манета ўжо з’явілася ў абарачэнні.
Ватыкан даручыў выкананне эскізу манеты скульптарцы Габрыэле Цітота.
На манеце змешчана выява святога Яна Паўла ІІ на фоне фасаду базылікі ў Вадавіцах і роднага дома Караля Вайтылы.
Побач змешчана зорка з васьмю промнямі — сімвал Найсвяцейшай Панны Марыі. Пад выяваю Папы — лаўравая галінка, што сімвалізуе хвалу святасці.
Дзяржава Ватыкан здзяйсняе эмісію сваіх манет. Штогод у абарачэнне выпускаюцца манеты розных наміналаў: 1, 2, 5, 10, 20 і 50 еўрацэнтаў, а таксама 1 і 2 еўра. Чаканяцца таксама манеты са срэбра і золата наміналам у 5, 10, 20, 50, 100 і 200 еўра. Штогод з’яўляюцца спецыяльныя манеты ў памяць пра розныя асаблівыя падзеі, напрыклад, Сінод Біскупаў, і юбілейныя манеты ў памяць пра Папаў і святых.
