21 лютага Папа Францішак прыняў на аўдыенцыі прэфекта Кангрэгацыі па справах кананізацыі кардынала Анджэло Бэчу і ўхваліў публікацыю дэкрэтаў па беатыфікацыйных і кананізацыйных працэсах.
Як паведамляе беларуская рэдакцыя парталу Vatican News, першыя тры дакументы датычаць прызнання цудаў, здзейсненых праз заступніцтва: благаслаўлёнага Лазара, вядомага як Дэвасахаям, індыйскага свецкага верніка, мучаніка, забітага з нянавісці да веры ў 1752 г.; благаслаўлёнай Марыі Франчэскі ад Езуса (свецкае імя Анна Марыя Рубата), італьянскай манахіні, заснавальніцы кангрэгацыі Сясцёр Капуцынак з Лаана, памерлай у 1844 г. ва Уругваі; Слугі Божага Карло Акуціса, італьянскага свецкага верніка, памерлага ў 2006 г. ва ўзросце 15 гадоў, вядомага дзякуючы сваім надзвычайным здольнасцям у галіне інфарматыкі, якія ён выкарыстоўваў на карысць Каталіцкага Касцёла, прапаведуючы Евангелле на інтэрнэт-прасторах і ў сацыяльных сетках.
Папа ўхваліў абнародаванне дэкрэту аб прызнанні мучаніцтва трох Слуг Божых: сальвадорскага езуіта а. Руціліё Грандэ Гарсіі і двух яго паплечнікаў, свецкіх вернікаў, забітых з нянавісці да веры ў 1977 г.
Яшчэ чатыры дэкрэты датычаць прызнання гераічнасці цнотаў трох італьянскіх святароў: кс. Эміліо Вэнтурыні, заснавальніка кангрэгацыі Сясцёр Служак Марыі Балеснай, памерлага ў 1905 г.; кс. Піро Скавіцы, памерлага ў 1964 г.; а. Эміліё Рэк’я з кангрэгацыі Стыгматаў нашага Пана Езуса Хрыста, памерлага ў 1969 г.; а таксама чылійскага свецкага верніка Марыё Ірыярто Пуліда, памерлага ў 1964 г. у ЗША.
