У пятніцу 14 лютага ў дзіцячым шпіталі Bambino Gesù (Дзіцяткі Езуса) у Рыме адбудзецца прэзентацыя новай кнігі Папы Францішка пад назваю «Дзеці — гэта надзея», якую Святы Айцец адрасаваў самым маленькім чытачам.
Як паведамляе Каталіцкае інфармацыйнае агенцтва КАІ, у кнігу для дзяцей увайшлі кароткія думкі Пятра нашага часу, сабраныя на 36-і старонках айцом Антоніё Спадара, езуітам. Малюнкі для выдання выканала амерыканская ілюстратарка Шэры Бойд. У прэзентацыі кніжкі возьме ўдзел філіпінскі кардынал Луіс Антоніё Гокім Тагле, прэфект Кангрэгацыі Евангелізацыі Народаў.
У анатацыі да выдання між іншым сказана: «Пасланне Францішка — універсальнае.
У гэтым зборніку Папа звяртаецца да самых маленькіх, запрашаючы іх прыняць дух дзялення, талерантнасці і міру. <…> У гэтай кніжцы Францішак гаворыць да дзяцей, дастасоўваючыся да іх шчырага погляду, проста і непасрэдна, і запрашае іх быць шчодрымі, не баяцца плакаць, рабіць дабро ў жыцці, а таксама ўсміхацца, заўсёды збірацца разам, радавацца і прыносіць радасць».
