14 лютага ў Італіі выйдзе кніга «Святы Ян Павел Вялікі» (San Giovani Paolo Magno), у якой раскрываецца духоўная сувязь Папы Францішка і святога Яна Паўла II.
Пра гэта са спасылкай на партал Rome Reports паведаміла беларуская рэдакцыя парталу Vatican News. Пры гэтым адзначаецца, што Ян Павел II, будучы Папам, 21 лютага 2001 года ўключыў Хорхэ Марыё Бэргольё ў Калегію кардыналаў, а Папа Францішак падтрымліваў кананізацыю свайго папярэдніка на Пасадзе святога Пятра і ў 2014 годзе абвясціў яго святым.
Кніга, якая неўзабаве выйдзе ў свет, — гэта запіс разважанняў Папы Францішка пра святога Яна Паўла ІІ, стагоддзе з дня нараджэння якога адзначаецца сёлета.
Публікацыя з’явілася як плён размоў паміж Святым Айцом і ксяндзом Луіджы Марыяй Эпікока ў перыяд з чэрвеня 2019 г. па студзень 2020 г.
Пантыфік вельмі цэніць працу і творчасць гэтага маладога святара і аўтара. У снежні ён уручыў адну з кніг аўтарства ксяндза Луіджы супрацоўнікам Рымскай курыі пасля традыцыйнай перадкаляднай сустрэчы.
