Пошук

16.01.2020 10:01   Паводле: Vatican News
Франчэска Дзі Джаванні. Фота: Catholic News Service

15 студзеня Папа Францішак прызначыў італьянку Франчэску Дзі Джаванні намеснікам сакратара Аддзела па сувязях з дзяржавамі Дзяржаўнага сакратарыяту, даручыўшы ёй кіраваць сектарам шматбаковых адносін.

Як паведаміла беларуская рэдакцыя парталу Vatican News, ватыканская чыноўніца лічыць, што яе прызначэнне на кіраўнічую пасаду — знак увагі Папы да ролі жанчын у Касцёле і ў грамадстве, але гэта не галоўная прычына выбару Святога Айца.

Франчэска Дзі Джаванні нарадзілася ў 1953 г. у Палерма, атрымала юрыдычную адукацыю і праходзіла практыку ў міжнародным цэнтры руху «Факаляры». З верасня 1993 г. яна была афіцыялам Аддзела па сувязях з дзяржавамі, займаючыся, у прыватнасці, пытаннямі, звязанымі з міжнароднымі дамовамі па міграцыі, міжнародным гуманітарным правам, камунікацыямі, прыватным міжнародным правам, становішчам жанчын, інтэлектуальнай уласнасцю і турызмам.

З новым прызначэннем у Аддзеле па сувязях з дзяржавамі будуць працаваць два намеснікі сакратара (падсакратары): Франчэска Дзі Джаванні і монсеньёр Міраслаў Вахоўскі, які займаецца сектарам двухбаковай дыпламатыі.

У інтэрв’ю Vatican News Дзі Джаванні распавяла, чым займаецца сектар шматбаковых адносін пры Аддзеле па сувязях з дзяржавамі: гаворка ідзе пра міжурадавыя арганізацыі і шматбаковыя пагадненні. Гэтаму аспекту дыпламатыі, патлумачыла яна, Папа Францішак надае вялікую ўвагу, хоць сёння яго эфектыўнасць нярэдка ставіцца пад пытанне.

На думку самой чыноўніцы, яе прызначэнне на такую высокую пасаду — гэта знак увагі Папы да ролі жанчын у Касцёле і ў грамадстве, аднак, у першую чаргу, гэта рашэнне, безумоўна, звязана з самой функцыяй, а не з тым фактам, што яна жанчына.

У той жа час яна перакананая, што жанчыны валодаюць асаблівым дарам «шукаць агульныя падыходы і ствараць адносіны, клапоцячыся пра адзінства».

«Трэба нястомна імкнуцца да дыялогу на ўсіх узроўнях, заўсёды шукаць дыпламатычныя рашэнні. Напрыклад, у нядаўняй прамове да дыпламатычнага корпусу Папа нагадаў, сярод іншага, пра шматлікія пазітыўныя дасягненні ААН, якая адзначае сёлета 75-годдзе з дня заснавання. Мы хочам і далей бачыць у ААН неабходную прыладу дасягнення агульнага дабра, хоць гэта не вызваляе нас ад задачы патрабаваць змен і рэформаў там, дзе ёсць такая неабходнасць», — звярнула ўвагу Франчэска Дзі Джаванні, кажучы пра сваю працу.

Абноўлена 16.01.2020 13:18
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа