Пошук


15.01.2020 11:22   Паводле: Vatican News
Папа на пенсіі Бэнэдыкт XVI і кардынал Рабэра Сара. Фота: ilsismografo.blogspot.com

Прэфект Папскага дома і асабісты сакратар Папы на пенсіі Бэнэдыкта XVI арцыбіскуп Георг Генсвайн паведаміў, што Бэнэдыкт XVI не даваў дазволу на пазначэнне сябе ў якасці суаўтара кнігі кардынала Рабэра Сара пра каштоўнасць цэлібату.

Пра гэта паведаміла 14 студзеня беларуская рэдакцыя парталу Vatican News, якая перадала выказванне ватыканскага іерарха на гэтую тэму:

«Магу пацвердзіць, што сёння раніцай па ўказанні Папы на пенсіі я звярнуўся да кардынала Рабэра Сара з просьбай звязацца з выдавецтвам і папрасіць прыбраць імя Бэнэдыкта XVI як суаўтара кнігі, а таксама прыбраць яго подпіс з-пад прадмовы і эпілогу», — сказаў арцыбіскуп Генсвайн у каментары інфармацыйнаму агенцтву ANSA.

Паводле асабістага сакратара, Бэнэдыкт XVI ведаў, што кардынал Сара рыхтуе кнігу аб святарстве і даслаў яму кароткі тэкст, дазваляючы выкарыстаць яго паводле свайго меркавання. У той жа час ён не аўтарызаваў ніякага праекту кнігі, падпісанай сваім імем, не бачыў і не ўхваляў вокладкі.

«Гаворка ідзе пра непаразуменне, не ставячы пад сумнеў давер Папы на пенсіі да кардынала Сара», — падкрэсліў прэфект Папскага дома.

Кніга «З глыбіняў нашых сэрцаў» (арыгінал назвы па-французску: De profondeur de nos cœurs), значная частка якой прысвечана каштоўнасці святарскага цэлібату, была падрыхтавана французскім выдавецтвам Le Figaro. Яе з’яўленне на паліцах кнігарняў планавалася на сёння, 15 студзеня.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.