![](/3/images/news/2019/09/2019-09-20-Papa.jpg)
Папа Францішак запрасіў педагогаў, палітыкаў і моладзь на сімпозіум пад назвай «Аднаўленне глабальнага выхаваўчага альянсу». Ён адбудзецца 14 мая 2020 года ў ватыканскай Зале Паўла VI.
Як паведамляе руская рэдакцыя парталу Vatican News, Святы Айцец, тлумачачы тэму і мэту гэтага мерапрыемства, спасылаецца на энцыкліку Laudato si’ і Дакумент аб чалавечым братэрстве, падпісаны ў Абу-Дабі 4 лютага.
У спецыяльным пасланні Папа аднаўляе «запрашэнне да дыялогу аб тым, якім чынам нам будаваць будучыню планеты», і падкрэслівае: «Любыя перамены маюць патрэбу ў выхаваўчым працэсе, каб магла выспець новая ўніверсальная салідарнасць і больш гасціннае грамадства».
Менавіта ў гэтым заключаецца мэта сустрэчы на тэму глабальнага альянсу, пакліканага стварыць адзіную выхаваўчую прастору «паміж вучобай і жыццём, паміж пакаленнямі, паміж выкладчыкамі, навучэнцамі, сем’ямі і грамадствам пасродкам яго інтэлектуальных, навуковых, мастацкіх, спартыўных, палітычных, прадпрымальніцкіх аспектаў і салідарнасці».
Такі альянс нараджае «мір, справядлівасць і ўзаемнае прыняцце паміж усімі народамі чалавечай сям’і, а таксама дыялог паміж рэлігіямі».
Папа кажа пра «глабальную выхаваўчую вёску», для стварэння якой неабходна зрабіць тры важныя крокі: па-першае, «паставіць у цэнтр чалавечую асобу»; па-другое, «крэатыўна і адказна інвеставаць лепшыя сілы», ствараючы дальнабачныя праекты; па-трэцяе, «выхоўваць людзей, гатовых служыць грамадству».