13 чэрвеня ў Гродне працягвалася ХІ Парафіяда дзяцей і моладзі Гродзенскай дыяцэзіі.
Гэты дзень, у які адзначалася ўстаноўленае нядаўна ў паўсюдным Касцёле свята Езуса Хрыста, Найвышэйшага і Вечнага Святара, удзельнікі традыцыйна распачалі святой Імшой, цэлебрацыя якой гэтым разам прайшла ў капліцы Міждыяцэзіяльнай вышэйшай духоўнай семінарыі.
На заканчэнне Эўхарыстыі дзецям і моладзі ўдзялілі прыміцыйнае благаслаўленне новапрэзбітэры кс. Эрнэст Мікалайчык і кс. Раман Вайцяховіч.
Пасля св. Імшы ўдзельнікі Парафіяды скіраваліся на стадыён ЦСК «Нёман», дзе правялі цэлы дзень у спаборніцтвах па самых розных відах спорту: бегу, скачкам у даўжыню з разбегу, кіданні мяча, бадмінтоне, настольным тэнісе, шашках, валейболе і футболе.
Асабліва моцныя выступалі адразу ў некалькіх дысцыплінах.
Завяршыўся трэці дзень Парафіяды таварыскім футбольным матчам, які згулялі паміж сабою каманда ўдзельнікаў і каманда арганізатараў.
