25–26 мая студэнты Міждыяцэзіяльнай вышэйшай духоўнай семінарыі ў Гродне разам з выхавацелямі наведалі Віцебскую дыяцэзію. Паездка стала магчымасцю адпачыць не толькі фізічна, але і духоўна.
Першым месцам у плане быў Лепель, дзе семінарыстаў шчыра вітаў пробашч мясцовай парафіі. Далей студэнты накіраваліся ў Полацк, дзе наведалі жаночы манастыр і Сафійскі сабор.
Захопленыя цікавай гісторыяй жыцця і дзейнасці Еўфрасінні Полацкай, будучыя святары паехалі ў Браслаў. Тут галоўным пунктам было наведванне дыяцэзіяльнага санктуарыя Маці Божай Валадркі азёраў.
Семінарысты таксама падняліся на гару Маяк, з якой адкрываецца цудоўная панарама Браслаўскіх азёраў і навакольных краявідаў.
У нядзелю семінарысты завіталі ў парафію Найсвяцейшай Тройцы ў Глыбокім, дзе маліліся разам з вернікамі на святой Імшы. Пасля смачнага абеду вандроўцы накіраваліся ў Мосар, дзе мелі магчымасць убачыць прыгожы касцёльны комплекс, заснаваны калісьці святой памяці кс. прэлатам Ёзасам Булькам.
Апошнім пунктам вандроўкі стала святыня ў Лучаі. Па дарозе ў Гродна семінарысты наведалі Гервяты, дзе памаліліся Ларэтанскай літаніяй.
