11 мая ў парафіі Найсвяцейшага Сэрца Пана Езуса ў Стадніках (Польшча) Віталій Венцкевіч, які належыць да Кангрэгацыі Ксяндзоў Найсвяцейшага Сэрца Езуса (сэрцане), прыняў сакрамэнт пасвячэння ў ступені дыяканату.
У снежні брат Віталій прынёс вечныя манаскія абяцанні. Як паведамляе партал Grodnensis.by, ва ўрачыстасці пасвячэння ўзялі ўдзел шматлікія сабраты з Польшчы і Беларусі, бацькі і родныя новапасвячанага дыякана.
Пасвячэнне ўдзяліў ардынарый Калішскай дыяцэзіі біскуп Эдвард Яняк, які ў гаміліі нагадаў, што святарства — гэта дар, атрыманы ад Бога.
Дыякан Віталій Венцкевіч паходзіць з гродзенскай парафіі Божай Міласэрнасці (Вішнявец), дзе служаць ксяндзы сэрцане. У Гродзенскай дыяцэзіі сэрцане працуюць таксама ў Астрыне. Роўна год таму пасвячэнне прэзбітэрату атрымаў старэйшы брат дыякана Віталія Аляксей Венцкевіч.
