27–28 красавіка ў Міждыяцэзіяльнай вышэйшай духоўнай семінарыі ў Гродне прымалі студэнтаў і выхавацеляў Пінскай семінарыі і I курса з Мінска на агульнабеларускай сустрэчы семінарыстаў.
Інтэграцыйная сустрэча распачалася супольнай малітвай і абедам, падчас якога рэктар семінарыі ў Гродне кс. Віталь Вайцяхоўскі прывітаў усіх гасцей і заахвоціў да плённага перажывання гэтага мерапрыемства.
Пасля абеду семінарысты мелі крыху вольнага часу, а пасля ўдзельнікі сустрэчы скіраваліся ў спартовую залу, дзе адбыліся футбольныя матчы паміж студэнтамі і выхавацелямі.
Спартыўныя спаборніцтвы спрыялі будаванню добрых адносін і знаёмству адзін з адным.
Ад фізічных практыкаванняў семінарысты перайшлі да духоўных. У гэты ж дзень у гродзенскай катэдры адбыўся канцэрт хору катэдры ў Базелі (Швейцарыя), які ахвотна наведалі будучыя святары. Важным пунктам дня стала Эўхарыстычная адарацыя — асабістая сустрэча з Езусам Хрыстом, крыніцай усялякай моцы кожнага святара. Вечарам у плане была братэрская сустрэча пры вогнішчы.
Другі дзень сустрэчы распачаўся ўрачыстай Ютранню ў семінарыйнай капліцы. У першай палове дня семінарысты мелі магчымасць пашпацыраваць па горадзе, а таксама даведацца шмат цікавых фактаў пра Гродна падчас экскурсіі. Галоўным пунктам стала св. Імша, якую ўзначаліў рэктар семінарыі імя св. Тамаша Аквінскага ў Пінску кс. Андрэй Рылка.
Мерапрыемствы такога роду спрыяюць блізкаму знаёмству паміж семінарыстамі, а таксама прыносяць добрыя плёны ў будучым супрацоўніцтве святароў.
Сустрэча, якая сабрала ўсіх студэнтаў духоўных семінарый Беларусі, у гісторыі ўжо не першая. Папярэдняя такая падзея адбылася ў 2016 годзе. Тады гаспадаром сустрэчы была семінарыя ў Пінску.
