Студэнты прапедэўтычнага курса Міждыяцэзіяльнай вышэйшай духоўнай семінарыі ў Гродне са сваім мадэратарам ксяндзом Паўлам Скубам узялі ўдзел у дыяцэзіяльнай пілігрымцы з Пінска ў Лагішын, якая прайшла 10 мая.
У Пінск семінарысты прыбылі напярэдадні. У гэты дзень яны паслухалі канферэнцыю аб гісторыі пінскага катэдральнага касцёла, удзельнічалі ў адарацыі і святой Імшы, якую цэлебраваў дапаможны біскуп Пінскай дыяцэзіі Андрэй Зноска, вечар правялі з моладдзю. На начлег пілігрымы засталіся ў пінскай семінарыі і адзначаюць, што былі рады пабачыць умовы, у якіх праходзіла фармацыя раней.
Пілігрымка ў Лагішын вырушыла раніцай. У пілігрымцы семінарысты актыўна дапамагалі ў спевах, рэгуляванні дарожнага руху і паднясенні крыжа. Разам з сёстрамі дамініканкамі з Баранавічаў яны распавялі аб сваім пакліканні, заахвоціўшы моладзь не баяцца адказаць на заклік Езуса Хрыста ісці за Ім.
Кульмінацыяй пілігрымкі стала святая Імша ў лагішынскім санктуарыі Маці Божай Каралевы Палесся, якую цэлебраваў біскуп Пінскі Антоні Дзям’янка.
Раніцай наступнага дня на зваротным шляху семінарысты наведалі санктуарый святога Андрэя Баболі ў Іванаве, дзе ўдзельнічалі ў Імшы. Святы Андрэй Баболя з’яўляецца апекуном цяперашняга прапедэўтычнага курса, таму семінарысты былі рады памаліцца ў тым месцы, дзе ён амаль 400 гадоў назад прыняў мучаніцкую смерць.
