25 лютага ў гродзенскім Доме сувязі адкрыўся музей пошты, які благаславілі адразу два святары — каталіцкі і праваслаўны.
Як паведаміў партал Гродзенскай дыяцэзіі Grodnensis.by, з боку Касцёла благаслаўленне здзейсніў кс. канонік Антоні Грэмза, віцэ-канцлер курыі Гродзенскай дыяцэзіі.
Варта адзначыць, што музей пошты размясціўся ў былой зале для тэлефонных перамоваў, дзе ў мінулыя гады (асабліва ў чацвер пасля абеду — падчас «выхаду на горад») можна было часта сустрэць студэнтаў Гродзенскай семінарыі, якая знаходзіцца непадалёк.
Экспанаты для пастаяннай выставы супрацоўнікі мясцовай пошты збіралі на працягу некалькіх гадоў. У экспазіцыі прадстаўлена больш за 300 звязаных з поштай артэфактаў. Многія з іх з’яўляюцца не проста рэдкімі, а адзінкавымі для Беларусі.
На выставе можна ўбачыць стол паштальёна, лісты і паштоўкі, паштовыя штэмпелі і ўніформу паштальёнаў розных часоў.
Сярод асаблівых экспанатаў — апарат для продажу канвертаў і паштовак 1970 года і разнастайныя паштовыя скрыні.
