З нагоды свята светлага Хрыстова Уваскрасення арцыбіскуп Юзаф Станеўскі, Мітрапаліт Мінска-Магілёўскі, кіруе віншаванні Мітрапаліту Веніяміну, Патрыяршаму Экзарху ўсяе Беларусі, і ўсім вернікам праваслаўнага веравызнання.
Ваша Высокапраасвяшчэнства
Уладыка Веніямін
Мітрапаліт Мінскі і Заслаўскі
Патрыяршы Экзарх усяе Беларусі
Дарагія браты і сёстры ва Уваскрослым Хрысце!
Хрыстос уваскрэс!
Дарагія браты і сёстры, ад усёй душы віншую Вас з вялікай і радаснай падзеяй — са святам светлага Хрыстова Уваскрасення!
Пасха Гасподня, якую мы адзначаем, ёсць свята перамогі Жыцця над смерцю. Той, Хто ёсць само Жыццё, аддаў Сябе ў халодныя абдымкі смерці, апусціўся ў змрочныя глыбіні пекла дзеля таго, каб знайсці там чалавека і вызваліць яго ад улады граху і д’ябла. Смерць паглынула Жыццё, але сама аказалася пераможаная Жыццём, не здолеўшы ўтрымаць Таго, Хто даў быццё ўсяму існаму.
Уваскрасенне Хрыста — гэта фундамент нашай веры, гэта крыніца моцы і перамянення нашага жыцця. Яно напаўняе наша існаванне ў гэтым свеце сэнсам, дае веру ў будучае.
Уваскрасенне Хрыста — гэта наша надзея, гэта надзея ўсяго чалавецтва і ўсяго свету.
Вера наша аб Уваскрослым Хрысце натхняе нас на міласэрнасць, спачуванне, любоў і тым самым пераўтварае ўвесь лад нашага жыцця, асвячае кожную справу, умацоўвае ў подзвігах цярпення і служэння бліжнім. Яна навучае нас бачыць у кожным чалавеку вобраз Божы, пазнаваць у церпячым пакуты Гасподнія, у тым, хто мае патрэбу, — кліч Самога Збавіцеля.
У гэты вялікі і радасны дзень шчыра жадаю ўсім Вам дапамогі Божай і Божага благаславення, здароўя, спакою і дастатку, шчасця і дабрабыту. Няхай у сем’ях заўсёды пануе любоў і ўзаемаразуменне, а ў душах — неўміручая пасхальная радасць. Няхай гэта радасць умацоўвае ў нашых сэрцах веру, надзею, любоў і да Бога, і да ўсіх людзей, якія вакол нас.
З Пасхай Гасподняй!
Сапраўды Хрыстос уваскрэс!
✠ Арцыбіскуп Іосіф Станеўскі
Мітрапаліт Мінска-Магілёўскі
