Пошук


14.01.2019 17:33   Фота: Юлія Пухальская / Catholic.by

13 студзеня ў парафіі Маці Божай Будслаўскай, што на Каменнай Горцы ў Мінску, напярэдадні Тыдня малітваў за адзінства хрысціянаў выступіў хор з суседняй праваслаўнай парафіі, а таксама адкрылася сумесная выстава малюнкаў каталіцкай і праваслаўнай моладзі.

Выступленне ў касцёле на Каменнай Горцы хора парафіі храма свяціцеля Мікалая Японскага і сумесная выстава малюнкаў каталіцкай і праваслаўнай моладзі на тэму «Каляды ў маім доме» стала своеасаблівай прэлюдыяй да Тыдня малітваў за адзінства хрысціянаў, што распачнецца ўжо праз некалькі дзён.

Гэты малітоўны тыдзень традыцыйна праходзіць з 18 па 25 студзеня. Штогод у міжнародным экуменічным набажэнстве бяруць удзел прадстаўнікі розных хрысціянскіх канфесій з больш як 100 краін свету.

Упершыню ідэя праводзіць малітвы аб адзінстве хрысціянаў з’явілася ў пратэстанцкім асяроддзі ў XVIII ст. Арганізаваны Тыдзень малітваў за адзінства ўпершыню прайшоў у 1908 годзе. Святар Пол Уотсан прапанаваў асаблівае набажэнства за адзінства Касцёла, і вось ужо больш за 110 гадоў у гэты час прадстаўнікі хрысціянскіх канфесій збіраюцца разам на набажэнствах, малітвах, канферэнцыях і іншых культурна-рэлігійных мерапрыемствах. Такія набажэнствы традыцыйна штогод праходзяць і ў Беларусі.

«Парафія Маці Божай Будслаўскай у Мінску ўжо не ўпершыню праводзіць падобныя сустрэчы з вернікамі праваслаўнай і пратэстанцкай канфесій. Так склалася, што здаўна на тэрыторыі нашай краіны жывуць людзі розных веравызнанняў, якія заўсёды праяўлялі талерантнасць і павагу адзін да аднаго.

Вельмі важна, каб у мітусні сучаснага жыцця не згубіць гэтай адкрытасці і ўзаемадаверу, для падтрымання якіх неабходны шчыры дыялог звычайных людзей, якія жывуць і працуюць побач у адным вялікім мегаполісе і побач будуюць свае храмы, як і ў старадаўнія часы было прынята на Беларусі.

Такія сустрэчы падмацоўваюць нашыя малітвы за адзінства хрысціянаў і спрыяюць фармаванню добрасуседскіх адносінаў», — падкрэсліў пробашч мінскай парафіі Маці Божай Будслаўскай кс. канонік Францішак Рудзь.

 

Абноўлена 14.01.2019 18:46
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.