16 снежня ў мінскім касцёле св. Сымона і св. Алены прайшла вечарына, прысвечаная 220-й гадавіне з дня нараджэння Адама Міцкевіча «Адамаў шлях пад вечным небам».
Сімвалічна, што сёлета таксама адзначыла 20-годдзе дзейнасці бібліятэка пры Чырвоным касцёле, якая носіць імя нашага славутага земляка, ураджэнца Навагрудчыны.
Як паведамляе парафіяльны сайт Chyrvony.by, на працягу гэтага года бібліятэкай было праведзена шмат мерапрыемстваў, прысвечаных 220-й гадавіне з дня нараджэння беларускага польскамоўнага паэта Адама Міцкевіча.
Вечарына «Адамаў шлях пад вечным небам» прайшла з удзелам гасцей з радзімы паэта: членаў гуртка па вывучэнню польскай мовы парафіі касцёла Арханёла Міхаіла ў Навагрудку, якія таксама прынялі ўдзел у каляднай сустрэчы з біскупам Юрыем Касабуцкім.
На вечарыне прагучалі музычныя творы ў выкананні ансамбля «Тутэйшая шляхта» і хора Cantus Cordis («Спеў сэрца»).
