19 жніўня праваслаўны і каталіцкі святары сустрэліся з маладым папаўненнем 72-га гвардзейскага аб’яднанага вучэбнага цэнтра падрыхтоўкі прапаршчыкаў і малодшых спецыялістаў у г. Барысаве.
Прысутнасць святароў у войску становіцца для Беларусі звычайнай справай. І хоць у нас пакуль няма афіцыйнага інстытуту вайсковых капеланаў, гэта ў будучыні можа прынесці немалую карысць і дапамагчы пазбегнуць складаных сітуацый, што месцамі ўзнікаюць падчас службы.
Каталіцкі святар кс. Ігар Мутрук, які браў удзел у сустрэчы з асабістым складам, казаў маладым вайскоўцам пра неабходнасць праяўляць падчас службы цярплівасць, любоў і братэрства.
Ён нагадаў ім пра тое, што ў Божых запаведзях заключаецца вялікая жыццёвая мудрасць, якая дапаможа годна пераадолець усе выпрабаванні. На заканчэнне сустрэчы святар адказаў на пытанні, якіх у жаўнераў было нямала.
Месяц таму кс. Ігар разам са сваім праваслаўным сабратам браў удзел у прывядзенні да прысягі маладых ваяроў. Ён звярнуўся да іх з прамовай, у якой заклікаў захоўваць вернасць прынятай прысязе і аддана служыць Бацькаўшчыне, не забываючыся пры гэтым пра чалавекалюбнае і міралюбнае вучэнне Хрыста.
