8 верасня Мітрапаліт Мінска-Магілёўскі арцыбіскуп Юзаф Станеўскі ўдзяліў сакрамэнт канфірмацыі групе вернікаў парафіі Нараджэння Найсвяцейшай Панны Марыi ў Барысаве (стары касцёл).
У гэты дзень парафія, у якой нясуць служэнне святары з законніцкай супольнасці ксяндзоў марыянаў, адзначала адпустовую ўрачыстасць тытулу касцёла Нараджэння Найсвяцейшай Панны Марыі — найстарэйшага і адзінага будынка ў горадзе, які мог бачыць французскі імператар Напалеон, калі ён быў у Барысаве падчас яго бясслаўнага паходу на Усход.
У сваім прывітальным слове на пачаткку ўрачыстай цэлебрацыі арцыбiскуп Станеўскі падкрэсліў, што тыя, хто прыме сакрамэнт хрысціянскай сталасці, асабліва моладзь, павінны будуць у далейшым як дарослыя людзі і сапраўдныя хрысціяне бараніць сваю веру, а перадусім жыць паводле гэтай веры. Арцыпастыр заахвоціў кандыдатаў да канфірмацыі несці годнае сведчанне пра Хрыста ў сваім асяроддзі.
«Просім Бога, каб умацаваў іх на далейшай дарозе да глыбейшага пазнання Езуса Хрыста, да жыцця ў супольнасці з Ім», — заклікаў да малітвы прысутных вернікаў іерарх.
Калі надышоў момант удзялення канфірмацыі, 24 кандыдаты разам з усімі вернікамі вызналі сваю веру, адракліся ад граху і прасілі, каб Дух Святы ўмацаваў іх у мужным вызнаванні веры і жыцці паводле яе праўдаў.
На заканчэнне Імшы прадастаўнікі барысаўскай парафіі выказалі арцыбіскупу Юзафу Станеўскаму словы падзякi за прысутнасць, за дар супольнай малiтвы і ўдзелены сакрамант. Канфірмаваныя таксама падзякавалі ўсім тым, хто рыхтаваў іх да прыняцця сакрамэнту хрысціянскай сталасці.
Пасля Імшы парафіяне, канфірмаваныя і іх блізкія не спяшаліся разыходзіцца. Яны віншавалі адно аднаго, дзяліліся радасцю і ўражаннямі. На іх тварах былі ўсмешкі, а ў некаторых нават слёзы радасці. Для ўсiх быў падрыхтаваны пачастунак i музычная праграма.
