![](/3/images/news/2018/08/2018-08-14-UckSoSCyDPk.jpg)
З 8 па 11 жніўня ў Воршы пад дэвізам «Касцёл — гэта сям’я» праходзіла чацвёртая парафіяда дзяцей і моладзі Віцебскай дыяцэзіі.
Сёлета ўдзел у мерапрыемстве бралі юнакі і падлеткі з парафій Варапаева (Пастаўскі дэканат), Верхнядзвінска, Віцебска (катэдра), Глыбокага, Лучая і Лынтупаў (Пастаўскі дэканат), Пагошчы (Відзаўcкі дэканат).
![](/3/images/news/2018/08/2018-08-14-6KGtkGfmQW8.jpg)
У канферэнцыях і гаміліях неаднаразова падкрэслівалася, што парафіяда — гэта не проста спаборніцтва і не спосаб вызначыць, хто лепшы.
Тут наогул не можа быць лепшых або горшых: усе ўдзельнікі годныя.
Сэнс парафіяды не зводзіцца толькі да перамогі. Моладзь збіраецца перадусім для таго, каб правесці час з Богам, каб праславіць Яго ў супольная малітве, у атмасферы адной вялікай сям’і.
![](/3/images/news/2018/08/2018-08-14-4ZrtuExQrgA.jpg)
Прыемна ўразілі шматлікія таленты і здольнасці, прадэманстраваныя ўдзельнікамі мерапрыемства. У спартовай частцы парафіяды моладзь Вiцебскай дыяцэзii праявiла сябе ў футболе, плаванні, тэнісе, валейболе, шашках, а таксама ў скоках у даўжыню i бегу.
![](/3/images/news/2018/08/2018-08-14-nAmrLHNiRIE.jpg)
Вольны ад конкурсаў час удзельнікі праводзілі ў гульнях як на паветры, так і настольных, займаліся інтэграцыйнымі танцамі, знаёміліся і дзяліліся досведам.
![](/3/images/news/2018/08/2018-08-14--MnZ7zqQvag.jpg)
Моцна ўзрушылі выступленні камандаў на конкурсе пантамімы, рэлігійнай песні і інсцэніроўкі.
Асабліва глыбока юнакі і дзяўчаты перажылі адарацыю Найсвяцейшага Сакрамэнту, падчас якой можна было аддаць Пану свой камень, што сімвалізуе грэх, і атрымаць Ягонае Слова, што дае жыццё.
![](/3/images/news/2018/08/2018-08-14-B3IQAq4Mn_4.jpg)
Чацвёртая парафіяда самай маладой беларускай дыяцэзіі ўрачыста завяршылася цырымоніяй узнагароджання. Па агульных выніках, пераможцам стала каманда з парафіі св. апостала Андрэя ў Лынтупах.
![](/3/images/news/2018/08/2018-08-14-rbS7j7WKg-0.jpg)
Больш дакладна пра вынікі чацвёртай парафіяды дзяцей і моладзі Віцебскай дыяцэзіі можна даведацца ТУТ>>>