Пошук



Урачыстай св. Імшой, цэлебрацыю якой узначаліў Віцебскі біскуп Алег Буткевіч, завяршыліся чарговыя дыяцэзіяльныя Дні моладзі, якія праходзілі ў Браславе з 23 па 25 ліпеня.

Для маладых людзей, якія прыехалі ў гэты маляўнічы куток Віцебскай дыяцэзіі, гэта быў плённы час, прысвечаны малітве, духоўным разважанням і магчымасці пабыць у супольнасці юнакоў і дзяўчат з падобнымі поглядамі.

«Тут сабралася вельмі сяброўская і таленавітая моладзь», — адзначыла Дзіяна Літвіновіч з Лынтупаў.

Дарэчы, многія маладыя ўдзельнікі адзначалі, што для іх сапраўды вельмі важна хоць некалькі дзён пабыць у супольнасці, дзе ты не выглядаеш «белай варонай» з-за сваіх рэлігійных поглядаў, як гэта часта здараецца ў сучасным секулярызаваным свеце. Гэта асабліва падкрэсліла Насця Жураўлёва з Наваполацка:

«На такіх сустрэчах адчуваеш, што ты не адна такая».

Менавіта на духоўную складаную гэтых Дзён моладзі звярнула ўвагу і Наташа Вячэрская з Мёраў. Дзяўчына распавяла, што мае вялікі досвед ўдзелу у падобных моладзевых форумах, але менавіта гэты ўразіў яе прыгажосцю літургіі.

 

Падчас правядзення Дзён моладзі было арганізавана пяць круглых сталоў, дзе моладзь абмяркоўвала праблемы, з якімі найчасцей сутыкаюцца юнакі і дзяўчаты ў сучасным свеце. Вось тэмы, якія на іх закраналіся: «Бяспека і небяспека ў інтэрнэце», «Традыцыйныя і нетрадыцыйная сям’я ў Беларусі», «Мужчына і жанчына: ад Я да Мы», «Твае сакрэты, якія табе перашкаджаюць жыць» і «Знайсці сваё месца ў Касцёле». Мадэратарамі абмеркаванняў былі як святары, так і свецкія асобы.

У гэтыя дні моладзь таксама мела магчымасць хрысціянскага адпачынку.

З вялікай радасцю юнакі і дзяўчаты танчылі падчас выступлення гурта з Баранавічаў The Crossway, які выступіў на гарадскім пляжы, каб на евангелізацыйны канцэрт маглі трапіць і іншыя жыхары Браслава.

У планы арганізатараў сёлета ўмяшалася надвор’е: вялікая залева перашкодзіла заканчэнню квэсту, які ўпершыню быў уведзены ў праграму Дзён моладзі.

Аб найбольш вострых праблемах моладзі была магчымасць паразмаўляць падчас сустрэчы з айцом Даніэлем Анжам, госцем Дзён моладзі. Французскі святар на працягу амаль дзвюх гадзін адказваў на пытанні, якія задавалі яму юнакі і дзяўчаты. Як пераадольваць крызіс веры? Ці магчыма адпачываць без Бога? Што такое шчасце? Як распазнаць сваё пакліканне? Хто такі Бог? Вось некаторыя з тых пытанняў, якія хвалююць каталіцкую моладзь.

   

Айцец Даніэль Анж, які на працягу трох дзён праводзіў канферэнцыі для моладзі, падчас якіх распавядаў і пра свой жыццёвы шлях, даючы сведчанне веры сваім жыццём, у гаміліі на заканчэнне Дзён моладзі заклікаў юнакоў і дзяўчат да асаблівага сведчання сваёй веры ў сучасным свеце.

Святар распавёў, што менавіта ў ХХ і ХХІ стагоддзі хрысціянства мае такую ж колькасць мучанікаў за веру, як і ў першыя стагоддзі існавання хрысціянства.

Асабліва кранальна гучаў яго аповед пра няпоўнагадовых мучанікаў за веру ў сучасным свеце. Сярод іншага, святар расказаў пра чатырохгадовага хлопчыка, які пад пагрозай смерці адмовіўся адрачыся ад Хрыста, за што і быў забіты.

На заканчэнне Дзён моладзі перад касцёлам моладзь зрабіла супольны фотаздымак разам з айцом Даніэлем і біскупам Віцебскім Алегам Буткевічам, які таксама правёў гэты час разам з моладдзю.

Абноўлена 26.07.2018 15:02
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця