Пошук
11.06.2018 13:48   Фота: Дзмітрый Ласько / Catholic.by

9–10 чэрвеня ў Мінску і Будславе прайшлі афіцыйныя культурна-рэлігійныя мерапрыемствы, прысвечаныя 100-годдзю дзяржаўнасці Літоўскай Рэспублікі, 25-годдзю з’яўлення першых літоўскіх аб’яднанняў у Беларусі і 5-й гадавіне пастаяннага душпастырства літоўцаў у Мінска-Магілёўскай архідыяцэзіі.

У мерапрыемствах бралі ўдзел арцыбіскуп Тадэвуш Кандрусевіч, Мітрапаліт Мінска-Магілёўскі, адказны за душпастырства літоўцаў Мінска-Магілёўскай архідыяцэзіі кс. Міхал Бубен, прадстаўнікі пасольства і ўладаў Літоўскай Рэспублікі, а таксама літоўскай дыяспары ў Беларусі, якая сёння налічвае больш за 5 тысяч чалавек. Форум стартаваў у суботу сустрэчай, арганізаванай у пасольстве Літоўскай Рэспублікі ў Мінску.

У нядзелю арцыбіскуп Тадэвуш Кандрусевіч узначаліў цэлебрацыю Эўхарыстыі на літоўскай мове ў Нацыянальным санктуарыі Маці Божай Будслаўскай.

Іерарх, чыя падрыхтоўка да святарства праходзіла ў Літве, у Вышэйшай духоўнай семінарыі ў Каўнасе, пяць гадоў таму св. Імшой на літоўскай мове ініцыяваў дзейнасць пастаяннага душпастырства літоўцаў у даручанай яго пастырскай апецы Мінска-Магілёўскай архідыяцэзіі.

З таго часу архідыяцэзіяльныя адказныя за душпастырства літоўцаў — спярша кс. Чэслаў Адамовіч, а цяпер кс. Міхал Бубен — рэгулярна цэлебруюць св. Імшу і здзяйсняюць іншыя неабходныя абрады на літоўскай мове.

У сваёй гаміліі ў будслаўскай базыліцы арцыбіскуп Кандрусевіч звярнуў увагу на супольную марыйную пабожнасць, уласцівую духоўнасці і рэлігійнаму жыццю католікаў Літвы і Беларусі. Іерарх правёў паралель паміж марыйнымі санктуарыямі ў беларускім Будславе і літоўскай Шылуве, якія прыблізна ў адзін час — 400 гадоў таму — былі выбраныя Багародзіцай і сталі асаблівымі месцамі Яе апекі, дзе шматлікія вернікі атрымліваюць праз заступніцтва Панны Марыі незлічоныя Божыя ласкі.

Урачыстую св. Імшу ў Будславе, у якой бралі ўдзел прадстаўнікі Міністэрства замежных спраў і Міністэрства адукацыі Літоўскай Рэспублікі, а таксама мінскай літоўскай дыяспары Vytís, упрыгожыў сваім спевам хор віленскай парафіі св. Арханёла Рафала Dainuojantys Rapoliukai — «Спяваючыя Рафалкі».

 

Абноўлена 11.06.2018 15:54
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа