Працягваецца месяц май і маёвыя набажэнствы на ўшанаванне Найсвяцейшай Панны Марыі. 13 мая яны мелі асаблівы «фацімскі» характар.
У гэты дзень сёлета прыпала 101-я гадавіна пачатку аб’яўленняў Маці Божай тром пастушкам у партугальскай Фаціме. Як вядома, гэтыя аб’яўленні адбываліся да кастрычніка 1917 года.
І ўжо 13-ы год у парафіі св. Юды Тадэвуша ў Вішневе (Гродзенская дыяцэзія, Смаргонскі дэканат), дзе нясе святарскае служэнне кс. пробашч Антоні Казлоўскі, кожны 13-ы дзень месяца з мая па кастрычнік праходзяць адмысловыя Фацімскія набажэнствы.
Па гэтых днях у вішнеўскім касцёле, што прыгожа размясціўся на маляўнічым пагорку ў засені векавых клёнаў, якія ў той час, калі Марыя аб’яўлялася партугальскім пастушкам, былі яшчэ маленькімі дрэўцамі, збіраюцца ўсе мясцовыя парафіяне, якія толькі могуць прыйсці — старыя і малыя. Святая Імша цэлебруецца ў інтэнцыях падзякі і просьбаў да Маці Божай.
…Доўга чытае святар ад алтара шчырыя і жыццёвыя людскія просьбы: сведчанне дзіцячага даверу Божага народа да сваёй нябеснай Матулі.
Пасля Імшы — працэсія вакол святыні, у якой вернікі, па чарзе змяняючыся, нясуць на ферэтроне фігуру Найсвяцейшай Панны Марыі Фацімскай.
Пяць прыпынкаў працэсіі — пяць таямніцаў святога Ружанца: цотныя таямніцы ўсе ўдзельнікі набажэнства моляцца з высока ўзнятымі ўгару рукамі. Узнятыя да неба рукі — знак пакорнай просьбы і пакаяння, перапрашэння за свае грахі і грахі ўсяго свету. Менавіта да такой малітвы заклікала сваіх дзяцей Маці Божая ў Фаціме больш за стагоддзе таму.
