Пошук
30.04.2018 14:06   Фота: Святлана Лабковіч / Catholic.by

«Няхай сустрэча стане гродзенскай "лабараторыяй" веры, у якой вы лепш пазнаеце Бога і сваё пакліканне. У ёй Касцёл прадстаўляе нам Марыю як прыклад для наследавання», — з такімі словамі звярнуўся да маладых людзей арцыбіскуп Тадэвуш Кандрусевіч 30 красавіка падчас III Сустрэчы каталіцкай моладзі Беларусі.

У межах агульнабеларускага моладзевага форуму, які праходзіць у Гродне пры парафіі Найсвяцейшага Адкупіцеля, Мітрапаліт Мінска-Магілёўскі ўзначаліў святую Імшу.

Іерарх нагадаў у гаміліі, што восенню ў Ватыкане адбудзецца Сінод Біскупаў, прысвечаны моладзі. У сакавіку ў Ватыкане прайшла перадсінадальная сустрэча моладзі, у тым ліку з удзелам прадстаўніка Беларусі.

Каталіцкі Касцёл у Беларусі, адчуваючы пульс сусветнага Касцёла, таксама прысвяціў гэты пастырскі год моладзі. Сёлетняя сустрэча беларускай моладзі распачалася напярэдадні прысвечанага Марыі месяца мая і завершыцца ў яго першы дзень. Таму лагічна, што яе дэвіз заклікае па прыкладу Марыі жыць у Божай ласцы.

«Шукаючы адказу на праблемы сучаснай моладзі, якая заблудзілася ў сучасным свеце, неабходна сказаць, што самай вялікай яе праблемай з’яўляецца крызіс веры, — адзначыў арцыбіскуп Тадэвуш Кандрусевіч. — Усё больш маладых людзей адмаўляецца ад веры і жыве так, як быццам Бог не існуе.

А калі яшчэ верыць, то верыць у такога бога, які павінен выконваць усе іх патрабаванні. Але такі бог не можа быць сапраўдным Богам».

Нярэдка, дадаў іерарх, «вера маладых людзей носіць павярхоўны і традыцыйны характар, чаго не дастаткова для адказу на вельмі небяспечныя выклікі сучаснасці».

«Кожны з нас перажывае цяжкасці ў веры і спакусу нявер’я. Адначасова кожны з нас з дапамогаю Касцёла і Божай ласкі можа спазнаць узрастанне ў веры і духоўнае ўдасканаленне, — звярнуў увагу Мітрапаліт. — Мы таксама павінны адчуваць сваю адказнасць за веру ў нашым наваколлі.

Неабходна бараніць сучасны свет ад праяўленняў секулярызму, маральнага рэлятывізму і ліберальнага гуманізму. Свет неабходна бараніць ад сучасных Ірадаў, якія імкнуцца знішчыць веру, надзею і любоў».

«Наша заданне — прадставіць Касцёл як прытулак супраць выклікаў нашага часу, асабліва супраць дэхрысціянізацыі, маральнага невуцтва, прыватызацыі веры і спіхвання яе на перыферыю жыцця, а таксама тэндэнцыі жыць так, як быццам Бог не існуе. У такіх абставінах трэба паказаць, што Бог не памёр, не пайшоў у адпачынак ці на пенсію, але жыве і дзейнічае», — падкрэсліў іерарх.

Закранаючы праблему распазнавання паклікання, якая з’яўляецца яшчэ адной праблемай моладзі, арцыбіскуп заўважыў, што гаворка ідзе не толькі аб пакліканні да святарства і кансэкраванага жыцця.

Гэтая справа больш шырокая, бо датычыць таксама паклікання да сямейнага жыцця.

«Бог кліча рознымі спосабамі. Праз іншых людзей, бацькоў, святароў і г.д. Ён прамаўляе праз розныя падзеі, у якіх мы павінны бачыць Божую волю. Асаблівым чынам Ён прамаўляе праз заўсёды жывое і дзейснае Божае слова, якое неабходна прыняць не толькі як гістарычную падзею, але і як актуальную», — дадаў Мітрапаліт.

Па словах іерарха, трэба памятаць, што «пакліканне нараджаецца з дармовай любові Бога». Таксама, нагадваючы пра пакліканне, «неабходна заўважыць, што Бог нікога не змушае, а толькі прапануе», паколькі «шануе свабоду выбару чалавека і чакае яго адказу».

Дасканалы ж прыклад свабоднага адказу Богу на Яго прапанову — Панна Марыя, якая «выказала сваю гатоўнасць у духу служэння свабодна выконваць Божую волю і стаць Маці Збаўцы».

«Пакліканне — гэта заклік Бога, які абдымае ўсё жыццё і нясе з сабой усведамленне абавязку і пачуцця атрыманай місіі. Яно вядзе да духоўнай дасканаласці, святасці і апостальства», — адзначыў арцыбіскуп Кандрусевіч.

Мітрапаліт дадаў, што хрысціянскае пакліканне «пашырае гарызонты нашага жыцця», таму хрысціянін, асабліва малады чалавек, «не павінен заставацца ў жыццёвай даліне і задавальняцца пасрэднасцю».

Іерарх нагадаў таксама пра вучэнне аб паўсюдным пакліканні да святасці, якое стала «вялікім адкрыццём Другога Ватыканскага Сабору». Гэтую ідэю развіў св. Ян Павел II, звяртае на яе ўвагу і папа Францішак.

«Пантыфік падкрэслівае, што мы становімся святымі, калі жывём евангельскімі благаслаўленнямі. Гэта галоўны шлях да святасці, таму што ён вядзе супраць плыні гэтага свету. Сама ж святасць дасягаецца шляхам простых жэстаў, якія здзяйсняюцца ў адносінах да людзей у штодзённым жыцці», — патлумачыў Мітрапаліт Тадэвуш Кандрусевіч.

«У нашу эпоху неабмежаванае імкненне да багацця і спажывецтва, а таксама пошук імгненнай прыемнасці звужае гарызонты жыцця і паслядоўна пазбаўляе надзеі, у выніку чаго шмат маладых людзей жыве без надзеі. У той жа час надзея на дасягненне святасці, якая актуалізуецца праз усведамленне асабістага паклікання, спрыяе інтэгральнаму развіццю чалавека», — адзначыў арцыпастыр.

Такім чынам, па словах іерарха, «пакліканне да хрысціянства адно, але ў ім існуюць розныя спосабы яго ажыццяўлення: святарства, кансэкраванае жыццё, сужэнства і г.д». Сутнасным жа з’яўляецца адказ Богу «Так» з падпарадкаваннем Яго волі.

Класічным прыкладам з’яўляецца малітва Езуса ў Гетсіманскім садзе перад крыжовай смерцю: Ён прасіў свайго Нябеснага Айца адхіліць келіх цярпенняў, які Яго чакаў, але ў той жа час пагаджаўся з Божай воляй.

«Дарагая моладзь, давер сябе Марыі і следуй Яе прыкладу, а Бог учыніць вялікія справы табе і праз цябе ўсяму нашаму народу», — заклікаў арцыбіскуп удзельнікаў III Сустрэчы каталіцкай моладзі Беларусі.

Абноўлена 30.04.2018 21:20
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.