Падчас Тыдня малітваў за адзінства хрысціянаў з 18 па 25 студзеня ў святынях усяго свету адбываюцца сумесныя экуменічныя набажэнствы. Праходзяць такія малітвы і ў касцёлах Беларусі.
Мінская парафія Маці Божай Будслаўскай — прыклад таго, як можна арганізаваць такую малітву на парафіяльным узроўні.
Пробашч парафіі кс. Францішак Рудзь расказаў Catholic.by пра арганізацыю экуменічнай малітвы і рэакцыю на яе парафіянаў:
«На экуменічную малітву я запрасіў святароў і пастыраў суседніх з нашай парафіяй супольнасцяў. Што вельмі радуе, усе яны адразу згадзіліся прыйсці. Нашы парафіяне ўважліва слухалі прамовы гасцей і кожнага ўзнагароджвалі апладысментамі», — адзначыў святар.
20 студзеня Імшу ў парафіі канцэлебраваў а. Яўген Усошын з Грэка-Каталіцкай Царквы. Прамаўляючы гамілію да вернікаў, ён звярнуў увагу на гістарычны аспект экуменічнай малітвы, адзначыўшы разнастайнасць традыцый у Каталіцім Касцёле.
21 студзеня парафію наведаў протаіерэй Павел Сярдзюк, настаяцель праваслаўнага храма Роўнаапостальнага свяціцеля Мікалая Японскага.
Пасля ранішняй святой Імшы святар звярнуўся да вернікаў з прамовай, у якой звярнуў асаблівую ўвагу на ролю сям’і ў сучасным свеце і важнасць супольнай малітвы.
Пасля літургіі апоўдні перад парафіянамі выступіў намеснік старшыні Саюза евангельскіх хрысціян-баптыстаў епіскап Аляксандр Лотараў. Ён падкрэсліў, што вельмі важна запрашаць Хрыста ў сваё жыццё, не марудзячы з гэтым.
«Пан Бог — наша сіла. Таму не будзем саромецца падымаць духоўную планку ў нашым жыцці і ўключаць Бога ў наша жыццё ў новым годзе», — заклікаў пратэстанцкі епіскап.
«Экуменічныя набажэнствы паказалі, што такія сустрэчы патрэбныя. Спадзяюся, мы зможам арганізоўваць іх часцей, а не толькі раз на год», — сказаў кс. Францішак Рудзь.
