З 19 па 26 лістапада ў парафіі Божай Міласэрнасці ў Асіповічах ўпершыню праходзілі святыя Місіі. Іх правялі айцы рэдэмптарысты Андрэй Ядкоўскі CSsR і Валерый Мазюк CSsR з Кангрэгацыі Найсвяцейшага Адкупіцеля.
Місійныя набажэнствы праходзілі штодня на працягу тыдня. Кожны дзень меў сваю тэматыку. У Божым слове місіянеры нагадвалі вернікам, што Бог з’яўляецца любоўю і што збаўленне магчымае толькі ў Езусе Хрысце.
Узрушальным стала набажэнства прабачэння і перапрашэння за памылкі, грахі і слабасці — вернікі маліліся ля крыжа, з якім напярэдадні працэсіяй ішлі вуліцамі горада, вызнаючы Езуса сваім Панам і Збаўцам.
Айцы рэдэмптарысты прамаўлялі асобную навуку для дзяцей, сем’яў, хворых, пажылых людзей і моладзі. У апошні дзень парафіяльных місій быў урачыста ўсталяваны і благаслаўлёны місійны крыж як напамін пра святыя Місіі.
Місіі сталі для парафіянаў часам духоўнага абнаўлення і паглыблення сэнсу святых сакрамэнтаў.
